Nudelzupa (Rosół)

Receptōw¹ na nudelzupa je możno tela, wiela je kuchŏrzy. Niyjedyn spōminŏ² zupa, kero rychtowała³ ōłma⁴ abo jako ciotka i już niyskorzyj⁵ żołdnymu⁶ niy udało się uwarzić takyj samyj. Choć tak po prŏwdzie to ôna u mie tyż za kŏżdym razym mŏ trocha inkszy smak- styknie dać wiyncyj natki zelera abo lubczyku i już nōm sie te arōmaty zmiyniajōm. Jŏ rychtuja jōm bez polepszaczy, glutaminianōw i inszych wynalazkōw (kostki rosołowe i magi to dzisiaj przede wszyjskim chymia). Możno ôna je delikatniyjszŏ we smaku, ale cały tyn smak je ze natury. Sprawdzołech se tyż recept na nudelzupa we ksiōnżkach, kere majōm wiyncyj jak sto lŏt i musza Wōm pedzieć, że sie ôn ôd tego czasu za kans⁷ niy zmiyniōł.

Co potrza?

miyso- nojlepi ze trzi zorty⁸ i żeby bōło tam tyż trocha kojści, bo potyn mōmy z tego tyż kolagyn, a ôn pomŏgo naszym stawōm; u mie bōł⁹ udzik ze kury, kōnsek żeberka wieprzowego i rostbef

grincojg¹⁰: marchew, pietruszka, zeler i boryj (niyftorzi dŏwajōm tyż kapusta)

cebula

zielynina: natka ze zelera, pietruszki i lubczyk

prziprawy: sōl, pieprz, pŏra listkōw bobkowych¹¹ i kulek ziela angelskego (choć jŏ tyż dŏwōm¹² trocha kurkumy, bo bez to mŏcie fajnŏ farba¹³, ale idzie dać tyż ździebko¹⁴ imbiru abo curry)

nudle

Nojprzōd¹⁵ do zimnyj wody przidzie miyso. Jak sie zacznie warzić i na wiyrchu sie napocznōm¹⁶ zbiyrać take siwe szuminy¹⁷, to je zebiercie i wyciepcie¹⁸. Potyn dejcie rajn¹⁹ tyn cały grincojg, zielynina i prziprawy. Cebula pryndzyj pokrejcie i przipiyczcie na złoto na maśle klarowanym, to dŏ fajnŏ farba, ale i tyż smak (niyftorzi przipŏlajōm cebula na ôgniu, ale mie sie zdŏ, że ta przismarzōnŏ mŏ lepszy smak). I terŏzki ta nasza nudelzupa musi sie aby bez 3 godziny na małym ôgniu pykać²⁰– pamiyntejcie,żeby pokrywka bōła trocha uchylōnŏ. Na kōniec trza jōm yno jeszcze doprawić do smaku, uwarzić nudle (ale nojlepi osobno, bo inakszyj nōm tyn rosōł zmyntnieje). Na talyrz mogecie dać nudle, trocha pokrōnyj marchwi i pokrōnŏ natka pietruszki… choć jak majōm ta nudelzupa zjejś małe bajtle²¹, to ô natce mogecie zapōmnieć 😉 Zalyjcie to zupōm i… smacznego 🙂

PS

1. Ze marchwi, pietruszki i selera idzie narychtować szałŏt²² (plus kartŏfel²³, jabko, jajco, groszek, ôgōrek- i niy trza dŏwać wszyjskego na rŏz, co fto lubi 🙂 )

2. Miyso ôbiercie i tyż zjydzcie- idzie dać je do szałŏtu abo i prziypiyc.

3. Jak ôstanie Wōm tyj nudelzupy, to pamiyntejcie, żeby jōm ochōdzić niy całkym zakrytŏ, niech ta pokrywka bydzie uchylōnŏ, bo sie inaczyj pōnojś moge pryndzyj zepsuć.