Gibki szałołt ze paluszkami krabowymi (Ekspresowa sałatka z paluszkami krabowymi)

Niyrozki¹ trza cojśik na szybko narychtować, bo idzie bezuch² abo dōmownicy³ ze godu⁴ już sie ciepjōm⁵ na kit we łoknach⁶….sztop,⁷ sztop, przaca takich łoknōw to już tera prawie żodyn niy mo, a jedzynie tych gumowych uszczelek mogłoby być dlo zdrowia dużo gorsze niż niyjedyn fastfood. Niy ma co wymyślać, mocie⁸ gōd, a niy mocie czasu, to sie szczelcie⁹ gipki szałołt 😉

Co potrza?

pó¹⁰ bojtla¹¹ ryżowych nudli

1 bojtel paluszkōw krabowych

1 łogōrek¹²

1-3 zōmbōw czosku¹³ (zależy łod¹⁴ tego, jak lubicie tyn smak i jako mołcie wōntroba)

połra łeżek majōnezu

trocha pokrōnyj¹⁵ natki pietruszki

pieprz i sōl

Nudle połōmcie¹⁶ na mańsze¹⁷ kōnski, zalyjcie w jakim garcu wrzōntkym, przikryjcie i biercie sie za krajanie. Paluszki krabowe (rozmrożōne) łobiercie¹⁸ ze papiōra,¹⁹ we ftory sōm²⁰ zawiniynte i pokrejcie na 1 cm kōnski.²¹ Łogōrka we kosteczka i krajanie fertich.²² Wciepcie paluszki i łogōrka do jaki miski, dodejcie łodcedzōne²³ nudle i wyciście tam czosnek. Majōnezu na poczōntek mogecie dać ze 2-3 łeżki, a keby Wōm bōł tyn szałołt potyn za gynsty, to mogecie go jeszcze dociepnōńć.²⁴ Tera yno jeszcze to trocha dosmakujcie wszysko pieprzym i solōm, posypcie pietruszkōm i fertich. Smacznego 🙂