Hekele (Śląska sałatka śledziowa- czasami w postaci pasty ;) )

Ło recept¹ na hekele to sie mie sam niyftorzi² pytali już połra³ miesiyncy tymu. Trocha czasu mi to wziyno, nim żech sie za to chyciōł. U mie w doma sie tego niy robioło, bo moja Muter niy znała tego ze swoji chałpy⁴– w tyj czyńści łopolskego tego niy znali. Ponojś⁵ hekele robiōła moja Ōłma ze Gliwic, ale jak żech zadzwoniōł do Ciotki do Niymiec, żeby mi pedziała,⁶ jako to narychtować,⁷ to żech sie dowiedzioł, że niy pamiynto. A jedna rzecz, co ji⁸ sie spōmniała, to to, że Ōłma mielōła to bez maszynka- to już bōło cojś.⁹ Moja Muter pedziała, że łod niyj kōmratka¹⁰– pani Magda- robi hekele i jak żech sie potyn dowiedzioł, to za starego piyrwy robiōła je i łod¹¹ ni muter i teściowoł. Tyn recept je taki gliwicko- pilchowicki, a joł tam od siebie jeszcze wciep łeżeczka mostrichu¹²– je kans¹³ receptōw, kaj ta łon sie pokazuje i bez to chciołech sie tego smaku sprōbować. Ta wersja bydzie pokrōno¹⁴, a bez to tyż trocha bliższo swoji nazwie: hekele pochodzi łod niymieckego hacken, co znaczy siekać.

Co potrza?

5 kōnskōw¹⁵ matiasōw 

3 uwarzōne¹⁶ na twardo jajca

2 wiynksze abo 3-4 mańsze łogōrki¹⁷ kiszone

1-2 cebule (sam¹⁸ sie musicie spytać swoji wōntroby, wiela ji dać 😉 )

pieprz

łeżeczka mostrichu

przed podaniym mogecie jeszcze dać łeżka mojōnezu

Nojważniyjsze je to, żeby porzōndnie wymoczyć te śledzie (na Śląsku niyrozki sie na nie gołdo heringi abo i harynki) i połra razy zmiynić im woda. Joł żech ostatnio mioł tak trocha mani¹⁹ czasu i żech sie pomyśloł, że jak je przepōkōm²⁰ i chwila pomocza, to im styknie. I żech sie przejechoł, bo te hekele wyszło tak słone i tak mie potyn suszōło, że żech myśloł, że ogupieja. Na moczynie słonych śledzi potrza połra godzin!

Potyn idzie już szybko. Trza drobno pokrajać cebula, łogórki, jajca i śledzie, dać łeżeczka mostrichu, trocha pieprzu i fertich. Kebyjście chcieli, to przed podaniym mogecie jeszcze dać łeżka majōnezu, ale jak go niy mołcie, to sie przeca²¹ nic niy stanie. Hekele robi sie wartko, a jak sie do tego weźniecie kōnsek jaki dobryj bōłki abo sznita²² chleba, to zmōcicie²³ to raz, dwa. Smacznego 🙂