Szałołt dlo frelkōw (Sałatka dziewczęca)

Ôstatnio¹ bōły² u nos na bezuchu³ mode⁴ frelki⁵ i tak żech sie pomyśloł, że trza by narychtować⁶ co lekego, bo ône przece⁷ terozki cołki⁸ czas rachujōm te kalorie i tak żech prziszoł na tyn szałołt. Potyn sie ôkołzało, że ône przikludziōły⁹ mi do dōm ciastka i cołko teoryjo¹⁰ szło o kant rzici roztrzajś¹¹– kōniec kōńcōw my zjedli i dietetyczny szałołt, i niydietetyczne ciastka. Do szałołtu bōły trzołski¹² ze miysa, ale co to je, to do tego przidymy trocha niyskorzi¹³.

Co potrza?

pó gōwki¹⁴ kapusty pekińskyj

150 g szpinatu¹⁵ (tych modych¹⁶ listkōw- tak ze pó bojtlika¹⁷ mogecie sam wsuć)

biksa majsu¹⁸

1 cebula

2 łeżki ôctu

2 łeżki cukru

2 jabka

250 g kiszōnych ôgōrkōw

Zōłza¹⁹:

sok ze poły citrōłny²⁰

3 łeżki oliwy

3 łeżki ôleju

sōl i pieprz

Cebula pokrejcie²¹ i wymiyszejcie ze cukrym i ôctym- fajnie puści sok i bydzie miała blank²² inkszy²³ smak. Składniki zōłzy wymiyszejcie w jakim gorczku²⁴. Kapusta pekińskoł, szpinat, jabka i ôgōrki pokrejcie na mańsze kōnski. Cuzamyn²⁵ ze majsym wciepcie²⁶ do srogi²⁷ miski, dociepcie do tego cebula, ôblyjcie zōłzōm i fertich²⁸. Tyn słodko- kwaśny smak bydzie pasowoł²⁹ do kołżdego miysa, ale i do fajnie przipieczōnyj abo narychtowanyj na parze ryby. Smacznego 🙂