Niyrŏz1 chcymy cojś wartko uwarzić2 i do tego ta zupa bydzie idealnŏ. Je trocha słodkawŏ, ale pasta ze curry dŏwŏ ji richtich fajny pikantny smak. I keby Wōm sie kedy trefiōł3 jaki wegański bezuch4, to mŏcie im co wlŏć do talyrza 😉
Jak we sklepie widzicie pasta curry, to sie jōm kupcie; jak bydzie wiynkszŏ, to zawsze mogecie reszta zamrojzić- nojlepi na tacce połōżcie kole siebie po jednyj łeżeczce pasty, a jak sie zamrojzi, to mogecie wciepnōńć to do jakego worka i niyskorzyj wyciōngać yno po jednyj „kulce”.
Co potrza?
1 małŏ bania- jŏ żech mioł piżmowŏ
2 marchwie
1 gruszka
1 banan
3-4 łeżki oliwy
1 cebula
1 łeżka pasty curry (abo łeżka prziprawy curry)
1 gorść żurawiny
pŏra łeżek uprażōnych ziorek słōnecznika
ździebko soli
Na oliwie zeszklić cebula, potyn dociepnōńć do tego ździebko soli, pokrōńŏ bania, marchew i trocha to posmażyć. Niyskorzyj dolyjcie do tego wody i dejcie na wiyrch pokrywka i niech sie to trocha powarzi. Jak już bania bydzie prawie miynkŏ, to dociepcie tam banana, gruszka i pasta curry. Niech sie jeszcze chwila powarzi, a potyn yno styknie to zmiksować, wciepnōńć tam żurawina i już mogecie wyciōngać talyrze. Po wiyrchu nojlepi posypać to uprażōnymi na suchym tyglu5 ziorkami słōnecznika. Smacznego 🙂
1czasem
2ugotować
3przytrafił
4odwiedziny
5patelnia
