Ajntopf wynołkwiany (Wymyślne danie jednogarnkowe)

Sōm¹ take ludzie, kere² na ôbiołd zawsze muszōm mieć dwa dania, ale joł na zicher³ je w jakim inkszym⁴ manszafcie⁵. A jak jeszcze sie narychtuja⁶ jaki fajny gynsty ajntopf i zjym sie ônego ze małōm dolywkōm, to już nic, yno sie kulać⁷.

Tyn ajntopf to je tako srogo⁸ improwizacyjo, ale musza Wōm pedzieć⁹, że je richtich¹⁰ udano 😉

Co potrza

25 dkg banie¹¹

4 marchwie

1 batat

biksa¹² biołych fandzołli¹³

2-3 łodygi zelera naciowego

dwie gorście suszōnyj żurawiny

1 cebula

3 pojedyncze piersi ze kury

łeżka oregano

ździebko¹⁴ chili

sōl i pieprz

połra łeżek oliwy

łeżka masła klarowanego

łeżka pasty paprykowyj (takyj ze tubki abo łeżka suszōnyj papryki)

łeżka posiekanyj natki ze pietruszki

0,5 litra wywaru ze grincojgu¹⁵

1 liter soku ze tōmatōw¹⁶

0,5 litra wody

jogurt grecki

Pokrōnego¹⁷ kurczaka mogecie przipiyc na suchyj patelni (abo dać tam ździebko¹⁸ klarowanego masła). Na oliwie i maśle zeszklijcie cebula, dociepcie tam pokrōnego batata, bania, zeler, marchew i niech sie to chwila podsmaży. Potyn wlyjcie ku tymu¹⁹ sok ze tōmatōw, wywar, woda, dejcie kurczaka, fandzołle, żurawina, prziprawy i niech sie to na małym ôgniu trocha powarzi. Jak już marchew bydzie miynkŏ, to mogecie sie pomału brać za jedzynie. Na talyrzu dejcie sie tam jeszcze łeżka jogurtu i mogecie po wiyrchu posuć jōm natkōm pietruszki. Smacznego 🙂