Napranoł rodzynka we szokolodzie (Ajerkoniakowopodobny napitek)




Niyftore1 bezuchy2 to sie naprōm3, żebych im zrobiōł ajerkōniak, a że joł4 niy lubia robić cołki5 czas tego samego, to co chwila mi sie trefiōm6 jake eksperymynty. Szokolada ze rumowym arōmatym i rodzynkami je idealno do maszkycynio7 i żech sie pomyśloł, żeby z tych składnikōw narychtować wariacja na tymat ajerkōniaku. Wyjszło idealne.

Co potrza?

gorść rodzynek

2 szokolady (deserowe abo mlyczne, abo jedna takoł, a drugo inkszoł)

1 szklōnka biołego rumu

1 szklōnka gorzołki8

6 żōłtek

100 g masła

1/4 szklōnku cukru

Joł to robia we blynderze, bo wtedy je nojmani9 roboty, ale kebyjście takego niy mieli, to mogecie w jaki misce sie to zrobić mikserym- yno uważejcie, żebyjście przi tym niy zamarasiyli10 całyj kuchni. Wtedy, przi miyszaniu z gorzołkōm, nojlepi przikryć miska, we wtoryj miksujecie, jakōm uciyraczkōm11. Prrr… zacznymy ôd12 poczōntku:

Nojlepi dziyń naprzōd13 zalyjcie rodzynki rumym i gorzołkōm, żeby fajnie sie nōm to przegryzło. Na drugi dziyń wciepcie do blyndera żōłtka ze cukrym, masło i go na chwila włōnczcie. Potyn przidzie tam ôzpuszczōnoł14 we kōmpieli wodnyj szokolada (we jaki misce nad gorkym ze wrzōntkym) i rodzynki wymiszane ze rumym i gorzołkōm. Nojprzōd nalyjcie yno trocha tego sznapsa15 i włōnczcie blynder, żeby sie nōm to wymiyszało, a potyn przidzie reszta rumu i gorzołki. I to cało filozofijoł16. Wlyjcie to do jaki srogi17 krauzy18 i dejcie19 do lodōwki, a niyskorzi20 już yno rozpusta… Smacznego 🙂

1niektóre

2goście

3zażyczyć sobie; ō- samogłoska w wymowie między o i u

4ja

5cały

6zdarzają

7łasuchowania

8wódki

9najmniej

10zabrudzili

11ścierka

12ô=ło

13wcześniej

14rozpuszczona

15alkoholu

16filozofia

17dużej

18słoika

19włóżcie

20później




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*