Kura we tōmacie i prawdziwkach (Kura w pomidorach i prawdziwkach)




Te danie to tak po prołwdzie1 je kura ze suszōnymi2 tōmatami i prawdziwkōma, ale wiadōmo, że te miana3 za duge być niy mogōm, a u mie i tak już niyrołz zalatuje barokym4. Suszōne tōmaty majōm cojsik fajnego we smaku, czego niy idzie sie doszukać we takich świyżych, do tego jeszcze arōmatyczne prawdziwki i… juzajś5 mi ślinka cieknie.

Co potrza?

1 kg podudzi ze kurczaka- nojlepi filetōw

gorść6 suszōnych tōmatōw (niy muszōm być take we zalywie, choć te ze krauzy7 tyż mogōm być)

gorść prawdzikōw

15-20 dkg wyndzōnki8

1 cebula

keliszek czerwōnego wina

trocha oliwy

sōl i pieprz (soli yno troszka, bo wyndzōnka baje fest słōnoł)

mōnka do zagynszczynia zōłzy

ewyntualnie trocha śmiytōnki

Pokrejcie9 wyndzōnka we kostka i przipiyczcie10 na patelni. Przeciepcie jōm do jakego wiynkszego gorka, a na patelnia wlyjcie11 trocha oliwy i zeszklijcie pokrōno cebula. Dociepcie jōm12 do wyndzōnki. Na patelnia- prawie sucho- przidōm tera kōnski13 kurczaka. Przipiyczcie je trocha i wrojście14 do gorka. Wlyjcie tam tyż keliszek wina, trocha wody, wciepcie tōmaty, prawdziwki (pokrōne na mańsze15 kōnski), sōl, pieprz i niech sie to na małym ôgniu aby ze pó godziny (a nojlepi i ze godzina) popykoł16. Niyskorzi17 mogecie zagyńścić trocha ta zōłza mōnkōm (nojprzōd trza jōm rozfyrlać18 w zimnyj wodzie) i fertich19. Kebyjście niy mōgli żyć bez śmiytōnki, to pod kōniec mogecie ji tam tyż dac połra20 łeżek, ale i bez tego ta zōłza bydzie miała richtich21 dobry smak. Do tego idzie zjejś klōzki, nudle22, kartołfle23 abo i jako fajno żymła24. Smacznego 🙂

1naprawdę

2ō- samogłoska w wymowie między o i u

3nazwy

4barokiem

5znów

6garść

7słoika

8wędzonego boczku

9pokrójcie

10przypieczcie

11wlejcie

12

13kawałki

14włóżcie

15mniejsze

16wolno pogotuje

17później

18roztrzepać

19gotowe

20kilka

21naprawdę

22makaron

23ziemniaki

24bułka




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*