Jajca nadziywane szinkōm i pieczarkōma ( Jajka nadziewane szynką i pieczarkami)




Dowiedzioł1 żech sie, że dziesiej je Miyndzynarodowy Dziyń Jajca- czego te ludzie niy wymyślōm. Pōnoć zawsze we drugi piōntek pajździernika sie łonego świyntuje. Yno niy wia, czy w tyn dziyń trza kłajś2 we lodōwce kole jajec kwiołtki, czy śpiywać kurōm sto lat? Niy wiym tyż, czy mie fto3 niy łoskarży o zniyczulica, ale wciepna4 sam dziesiej przepis na danie ze jajec. Nojbarzi5 pasujōm łone na Wielkanoc, ale take nadziywane jajca to sie i przidajōm przi jakim inkszym fajerze.6

Co potrza?

uwarzōne na twardo jajca (niy czytejcie tego kurōm!). Wiela ich wziōńć? To już zależy łod tego, wiela bajecie mieć przi stole gojści.7

majōnez

połra8 pieczarkōw

połra szajbōw9 szinki

połra radiskōw10

sznitloch11

sōl i pieprz

ździebko12 kurkumy

Uwołrzcie pieczarki. Łobiercie te jajca i przekrejcie13 na pó14. Małōm łyżeczkōm wybiercie ze nich żōłtka (poła15 dejcie do jednyj miski abo talyrza, a poła do drugi). Pożgejcie16 te żōłtka widołkōm17. Do jednych dejcie pokrōno na drobne kōnski18 szinka, radiski i sznitloch, a do drugi pokrōne pieczarki i trocha kurkumy. Tera wciepcie tam trocha majōnezu, soli, pieprzu i porzōndnie wymiyszejcie. Skosztujcie sie tego nadziynia i doprołwcie. Keby19 bōło za suche, to dejcie jeszcze trocha majōnezu. Potyn małōm łyżeczkōm nakłodejcie tyn farsz do kołżdego jajca, poukłołdejcie sie je fajnie na jakim talyrzu i… smacznego 🙂

Nadziywane jajca kwadrat- małe

 

1dowiedziałem

2kłaść

3ktoś

4wrzucę

5najbardziej

6imprezie

7gości

8kilka

9plastrów

10rzodkiewek

11szczypiorek

12szczyptę

13przekrójcie

14pół

15połowę

16rozdrobnić

17widelcem

18kawałki

19gdyby




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*