Zupa kryjm ze bani ze chrupiōncōm szinkōm i grzankōma (Zupa krem z dyni z chrupiącą posypką ;) )

Moja Baba¹ mi wczora padała,² że na mitag³ to by nojlepi zjadła zupa ze bani. Listopad to je nojlepszy czas na zupa ze bani. Kedyjś robiōłech już tako ze tajskimi prziprawōma i tak żech sie pomyśloł, że trza by bōło iś⁴ w trocha inkszo strona, bo to tyż przeca⁵ niy wszyscy- tak jak my- lubujōm sie we kuchniach z cołkego świata. Zupa wyszła bardzo dobro i bez⁶ to sie ciesza, że ji⁷ jeszcze trocha łostało⁸ i na dzisiej 😉

Co potrza?

0,5 kg bani

3 abo i 4 marchwie (dołwajōm⁹ tako fajno słodkość)

2 kartołfle

1 cebula

2 zōmbki czosku

syrek topiōny

połra¹⁰ gałōnzek lubczyku

2 łeżki kaparōw

masło klarowane

oliwa

woda

30 dkg szinki

6-8 sznitōw¹¹ chleba tostowego

sōl i pieprz

Nojprzōd pokrejcie- tak byle jak- te warzywa i podsmōłżcie je na maśle (yno, żeby sie cebula zeszklōła). Potym jeszcze do smaku kapnijcie trocha oliwy, ale niy podsmażejcie już tego na za srogim¹² hicu, bo oliwa pōnoś¹³ go niy lubi. A terozki wlyjcie wody- yno niy za dużo, żeby ta zupa niy bōła za rzodkoł. Nojlepi, żeby yno przikrōła warzywa. Wciepcie lubczyk, trocha soli, pieprzu i niech sie to tak ze 15-20 minut powarzi- żeby bania zmiynkła. Potym wciepcie te kapary, syrek i niech sie to dali¹⁴ warzi. Tera trza chwila poczekać, żeby trocha ochōdło, zanim bajymy to miksować. Jak już zmiksujecie, to trocha idzie to jeszcze podgrzołć i doprołwić.¹⁵

Szinka pokrejcie we kostka i wciepcie na patelnia ze 2 łeżkōma masła klarowanego. Jak sie już to trocha podsmażi, to mogecie tam tyż dociepnōńć pokrōny we kostka chlyb tostowy. Jak sie tyn chlyb trocha przibrōnołci, to już mōmy i to fertich.¹⁶

Zupa nalyjcie na talyrz, posypcie tōm chrupiōncōm szinkōm i grzankōma i… smacznego 🙂