Gańś ze apfylzinōm (Gęś z pomarańczą)

Na świyntego Marcina pōnoś musi być gańś abo gyńś- te biołe gyngajōnce stwory majōm na Ślōnsku roztomajte1 miana.2 Jak żech bōł mały, to my chowali3 gańsi, bo to trza bōło chopcōm piyrza na pierziny naszykować, a że we sklepach bōło pusto, a tako gańś wymagań srogich niy mo, to i sie łone4 kole chałpy łajzioły.5 Niystety jedyn stary gōńsior mie rołz tak pogōniōł6 i poszczypoł po purzitkach,7 że do dzisiej spokojnie kole gańsi przelyjś niy umia. Chyba, że już bez piyrza siedzi we lodōwce, to tako sie nawet lubia przikludzić8 do dom, a potyn jōm fajnie ogrzołć we jaki brytfance abo piekarniku 😉

Co potrza?

1 pierś ze gańsi

sok ze 2 apfylzinōw

2 suszōne figi

keliszek różowego wina (abo biołego)

ździebko9 gałki muszkatałowyj

sōl i pieprz

Jo sie z tōm gańsiōm niy smolōł,10 żech jōm wciep do brytfanki ze tym sokym, winym, suszōnymi figami, gałkōm, pieprzym (soli dołech11 trocha późni) i żech jōm tam dusioł 45 min. Kebyście mieli czas, to mogecie ze tych wszyskich składników zrobić marynata i te miyso12 w ni trzimać bez noc, żeby sie fajnie przegryzło.

Jak już sie te miyso podusiōło (jak byjście je dusiyli wiyncyj niż godzina, to by bōło jeszcze lepi, ale joł13 żech już bōł taki godny14, że żech dużyj15 niy mōg16 szczimać17 😉 ), to je we odkrytyj brytfance wrołźcie18 na pó19 godziny do nagrzōnego na 200 stopni piekarnika. Potyn wyciōngcie miyso ze brytfanki, a do zōłzy20 dodejcie trocha mōnki i mogecie jōm tyż zblyndować, żeby sie te figi fajnie złōnaczōły.21 Podgrzyjcie ta zōłza jeszcze trocha, żeby zgynstniała i biercie sie za jedzynie. Do taki gańsi to pasujōm i kloski, i kartołfle, i frytki… nie ma co dużyj pisać: smacznego 🙂

 

Gańś ze apfylzinom 2- małe

 

1różne

2nazwę

3chodowali

4one

5chodziły

6pogonił

7pośladkach

8przynieść

9szczyptę

10nie marnowałem zbytnio czasu

11dałem

12mięso

13ja

14głodny

15dłużej

16mógł

17wytrzymać

18włóżcie

19pół

20sosu

21w tym przypadku: zmiksowały

Dodaj komentarz

Twój adres email nie zostanie opublikowany. Pola, których wypełnienie jest wymagane, są oznaczone symbolem *