Smażōnka (Jajecznica)

Pomyśloł żech sie, że trza by sam wciepnōńć1 tyż jaki recept2 do tych, co to majōm dwie lewe rynce do warzynia.3 Coś ajnfachowego,4 a przi tym- jeszcze jak sie moł5 jajca łod szczyńśliwych kurōw- tak dobrego, że niyjedna baba abo chop bydzie chcioł łostać6 na taki frisztik.7 Dać sam idzie8 i szinka, i wōszt,9 i wyndzōnka10 abo, jak to za starego piyrwy11 bōło, kōnsek szpeku.12 Na kōniec trocha sznitlochu13 i…. prrr…, to tera łod poczôntku.

Co potrza?
jajca (umyte)- wszysko zależy łod tego, wiela14 Wołs bańdzie15 do tego jedzynia, ale idzie pedzieć,16 że tak 3 jajca na łebka
kōnsek szinki abo wyndzonki, abo szpeku
trocha sznitlochu
sōl
trocha masła klarowanego

Joł lubia sie zrobić nawet same jajca, bo jak prziwieza sie take łod kurōw, co to je chowie17 moja Muter,18 to łōne sōm19 aże słodke. Minus je taki, że jak czowiek łajzi20 po placu, to trza dać pozōr,21 kaj sie depce.22
Jak idzie o smażōnka, to niy lubia, jak biōłko je niy do końca zetniynte, ale lubia lejōnce sie żōłtka i bez to noprzōd23 oddzielōm żōłtka łod biōłek. Na łobrołzku24 je smażōnka ze wyndzōnkōm i to łona, ta wyndzōnka, idzie na patelnia za piyrszo. Jak już sie fajnie podpiecze, to wciepuja dō ni biōłka- soli nirozki wcale niy trza dołwać,25 bo wyndzōnka je słōnoł. Jak już biōłka sōm porzōndnie upieczōne, to wciepuja żōłtka. Tera już nawet idzie wyłōnczyć łogyń pod patelniōm, żeby sie żōłtka za kans26 niy zetły,  trocha to pomiyszać, posuć pokrōnym sznitlochym i brać sie za jedzynie. Smacznego 🙂

Smarzonka- małe

1wrzucić

2przepis

3gotowania

4prostego

5ma

6zostać

7śniadanie

8można

9kiełbasa

10boczek wędzony

11dawniej

12kawałek słoniny

13szczypiorku

14ile

15będzie

16można powiedzieć

17chowa

18mama

19są

20chodzi

21uważać

22gdzie się chodzi

23najpierw

24zdjęcie

25dawać

26dużo

Dodaj komentarz

Twój adres email nie zostanie opublikowany. Pola, których wypełnienie jest wymagane, są oznaczone symbolem *