Armeriter de lux (Bułkowy recykling de lux ;) )

Mōndre1 ludzie by pedzieli,2 że ta nazwa to je richtig3 oksymoron, bo armeriter pochodzi łod niymieckego Arme Ritter, co znaczy biydny rycerz, a co to je de lux, to już chyba wiedzōm nawet małe bajtle4– jak we jednyj nazwie sie znojdōm 2 przeciwstawne wyrazy, to je oksymorōn; rechtory5 bydōm6 zachwycōne 😉 De lux tak po prołwdzie7 to je ta zōłza, a jak jeszcze bydziecie mieli dō ni świyże pozimki,8 to take śniołdanie straci sie, nim zdōnżycie dopić Wasza kawa.

Co potrza?

3 stare bōłki abo jak to niyftorzi gołdajōm: żymły (jak byjście mieli lynga9 abo wek- bo to tyż moł roztomajte miana, to tyż baje dobre)

2 jajca

szklōnka mlyka

2 łeżki brōnołtnego10 cukru

2 łeżki masła klarowanego

kapka łoleju

zōłza:

10-15 dkg pozimek

1 biołoł11 szokolada

1 łeżka miodu abo brōnołtnego cukru, keby Wōm ta zołza bōła za moło słodkoł

Obrane pozimki zmiksujcie, postołwcie na piecu na małym łogniu (niy mogōm sie zawarzić12) i wciepcie13 tam do rozpuszczynia ta biołoł szokolada. Jak sie rozpujści, to mogecie jeszcze dać trocha miodu (abo cukru) i fertich. 14

Jajca rozfyrlejcie15 (mogecie i mikserym) ze cukrym i mlykiym. Rozgrzyjcie sie na patelni łeżka masła i kapka łoleju. Pokrejcie bōłka abo wek na szajby,16 porzōndnie tōnknijcie17 we jajcach z mlykym i wciepcie na patelnia. Jak sie fajnie przibrōnołci18 ze obu strōn, to wciepcie je na talyrz, łoblyjcie zołzom i smacznego 🙂

Armeriter de lux- małe

 

1mądrzy

2powiedzieli

3prawdziwy

4dzieci

5nauczyciele

6będą

7tak naprawdę

8truskawki

9bułka paryska

10brązowy

11białą

12zagotować

13wrzućcie

14gotowe

15roztrzepać

16kromki

17zamoczcie

18przysmaży

Dodaj komentarz

Twój adres email nie zostanie opublikowany. Pola, których wypełnienie jest wymagane, są oznaczone symbolem *