Szajerkōniak (Likier jajeczny z białą czekoladą)

Niy, tyn ajerkōniak niy bōł wymyślōny bez hobbitōw ze „Władcy pieszczōnkōw” (abo ringōw- bo tak by sie to musiało mianować po ślōnsku), co miyszkali we Shire [czyt. szajer]. To je ajerkōniak ze biołōm szokoladōm, a że roztomajte sznapsy¹ niy mogōm mieć za dugich² nazwōw, to tak żech prziszoł na szajerkōniak. Naszło mie tak na to we Dziyń Kobiyt, a że trocha to trza bōło potestować, to dopiyro dzisiej moga Wōm zdradzić tyn recept³.

Co potrza?

6 żōłtek

0,5 szklōnki cukru

100 g masła

2 rozpuszczōne biołe szokolady

jedna halba ⁴(czystyj)

keliszek rumu

Joł mōm blynder i w takim łonym to kołżdy ajerkōniak, kakaōwka abo szajerkōniak sie zrobiōm raz-dwa. Wciepcie⁵ tam masło, żōłtka, cuker i włōnczcie blynder- pamiyntejcie, żeby na wiyrch⁶ dać pokrywka, chyba, że lubicie maras⁷ we kuchni 😉 Jak sie to trocha wymiyszo, to wlywołcie tam rozpuszczōno (we jaki misce nad gorkym ze wrzōntkym|) szokolada, trocha gorzołki⁸ i włōnczołcie. Potyn reszta halby, rum i niech sie to tam połra⁹ minut fajnie pomiyszoł.

Jak niy mołcie blyndera, to wciepcie masło i cuker do plastikowyj miski i włōnczcie sie mikser. Za chwila dociepcie¹⁰ tam żōłtka i miksujcie, aż cuker sie rozmiyszoł- tak sie strasznie z tym niy smōlcie¹¹, bo jak przidzie gorzołka, to sie to jeszcze lepi łozpuści¹². Tera wlywejcie pomału ta halba, rum i dali miksujcie. Sprōbujcie, czy cuker sie dobrze łozpuściōł, a jak wszysko sie dobrze połōnczōło, to idzie¹³ tyn szajerkōniak wlywać do flaszki abo jaki krauzy¹⁴.

Z szajerkōniakym je jak ze ajekōniakym- niyftorzi¹⁵ nojbarzi¹⁶ lubiōm, jak łon¹⁷ tak fajnie stwardnie we lodōwce i potyn idzie go wylizywać ze keliszka abo wybiyrać go łeżeczkōm i bez to lepi go trzimać we krauzie. Smacznego 