Szinka we grincojgu (Szynka we włoszczyźnie)

Na świynta moja Muter już połra lołt1 kupuje wyndzōnoł2 szinka, takoł w cołojści i do tego tak fajnie powiōnzano dratwōm3. Owijoł jōm potyn we alufolia4 i pieke5 bez6 godzina abo półtora we bratrurze7. Chop w kuchni- jak już wiycie- lubi sznupać8 po roztomajtych receptach9, wymyślać, eksperymyntować i tak prziszoł na ta idyja10, coby ta szinka uwarzić. A żeby z tego warzynioł do tyj szinki tyż wlazły jake nowe smaki, to sie jōm uwarzōł ze grincojgym11. I niy dojś, że mu wyszła z tego luksusowoł szinka, to ze grincojgu mōg12 sie jeszcze zrobić szałołt.

Co potrza?

szinka wyndzōnoł- jedyn kōnsek

opakowanie grincojgu- marchew, zeler, boryj, pietruszka (niyroz sie i trefi trocha kapusty)

trocha lubczyku (moge być suszōny)

cebula

trocha korzyni (pieprzu)

2-3 liście bobkowe13

Do garca nalyjcie wody i niech sie grzeje. Ze tyj szinki ściōngcie ta siatka- niy bōjcie sie, niy łozleci sie we warzyniu. Łobiercie sie marchewka, zeler i pietruszka, a jak woda napocznie wrzeć, to wciepcie14 do garca ta szinka, grincojg, prziprawy i trocha nad łogniym przipołlōnoł15 cebula. I tera niech sie to tak ze godzinka, a nojlepi i półtora, pomału pykoł16. Potyn wyciōngcie ta szinka, niech sie trocha ochōdzi17 i już mogecie sie jōm skosztować.

Joł żech sie pokrajoł ta uwarzōnoł marchew, pietruszka i zeler, dołech do tego pokrajane jabko, ze dwa małe kiszōne łogōrki, trocha majōnezu i już żech mioł ajnfachowy18 szałołt. Yno, że joł żech mioł do wykarmiynia yno dwie gamby19, gorzyj by bōło, keby20 trza z tego zrobić szałołtu do całyj familije. Choć jak Wołs je dużo, to przeca niy idzie zrobić jednyj szinki, bo to przeca musi jyj łostać tyż i do sznitōw21, a jak warzicie 2 szinki, to i mogecie dać wiyncyj grincojgu… i fertich22.

Tyn wywar niystety niy je dobry do jedzynioł- sprōbowoł żech- bo je za słōny, ale i tak mōmy z tego kans23 dobroci i trocha mani słōnoł szinka- Wasze serce bydzie rade24 😉 Smacznego 🙂

Szinka we grincojgu-małe

1od kilku lat

2wędzoną

3sznurkiem

4folię aluminiową

5piecze

6przez

7piekarniku

8szukać

9przepisach

10pomysł

11włoszczyzna

12mógł, ō- samogłoska w wymowie pomiędzy o i u

13laurowe

14wrzućcie

15przypaloną

16bulgocze

17ostudzi

18zwykły, prosty

19tu: 2 ludzi

20gdyby

21kanapek

22gotowe

23dużo

24zadowolone

Dodaj komentarz

Twój adres email nie zostanie opublikowany. Pola, których wypełnienie jest wymagane, są oznaczone symbolem *