Windbojtle (Ptysie)

Już dołwno żech niy zaglōndoł do tyj staryj ksiōnżki ze receptami1, kero mi pożyczōła kōmratka2 od moji Mutry3. Ksiōnżka ta moł w tym roku 90 lołt i bez to werciōłoby4 sie cojsik z ni upiyc, tym barzi, że nawet Pani Truda- bo tak sie nazywo ta kōmratka- gołdała mi, że sie mōm zrobić te windbojtle. Robi sie je szybko, a rajn5 idzie wciepnōńć byle co. Joł żech robiōł już ze ślagzanōm6, kryjmōm z pudingu, a nawet na słono ze pastōm ze łososia. Jak byjście chcieli sie zrobić filowane7 czym słōnym, to do ciasta niy dołwejcie cukru ani arōmatu waniliowego. Take windbojtle sōm tak ajnfachowe8, że nawet bajtle umiōm je narychtować- sōm żech to widzioł 😉

Co potrza?

125 g masła

125 g mōnki pszynnyj

250 ml wody

3 jajca

1 łeżeczka proszku do pieczynioł

1 łeżka cukru

1 łeżeczka cukru waniliowego abo kapka arōmatu

Do gorka wlyjcie woda, masło, dejcie cuker, cuker waniliowy i niech sie to zacznie warzić9. Potyn wsujcie tam mōnka i cały czołs miyszejcie, aż zgynstnieje. Terozki trza to ochōdzić10.

Niyskorzi11 wejście sie mikser, przełōżcie ta masa do jaki miski, wmiyszejcie do ni po jednym te jajca i dejcie proszek do pieczynioł.

Rozgrzyjcie bratruła12 na 200 stopni, przigotujcie sie 2 blachy, wyłōżcie na nich papiōr do pieczynioł i małōm łeżeczkōm nakłołdejcie na blacha po trocha tyj masy. 1 połno łeżeczka to jedyn windbojtel i pamiyntejcie, żeby ich niy kłajś13 za gynsto, bo jak zacznōm rojś, to sie Wōm posklejajōm. Te blachy nojlepi piyc osobno. Wkłodejcie do pieca na 20 minut, a potyn mogecie trocha uchylić dwiyrze14 łod bratruły i je posuszić15. Pamiyntejcie, że czas pieczynia zależy łod pieca. Jak już te piyrsze bydōm upieczōne, to zajś rozgrzyjcie ta bratruła (bez ta uchylōnoł klapa mōg nōm kajś16 uciyc tyn hic17) i drugo blacha piyczcie tak samo.

Jak już windbojtle bydōm fertich,18 to mogecie sie rajn dać ubito śmiytōnka ze pudecukrym19 (wiela go dać, zależy łod tego, jak lubicie słodke) abo jako Wōm sie yno uwidzi20 kryjma. Smacznego 🙂

Windbojtle- małe

1przepisami

2koleżanka

3mamy

4opłacało

5do środka

6 bitą śmietaną

7nadziewane

8proste

9wrzeć

10ostudzić

11później

12piekarnik

13kłaść

14drzwi

15posuszyć

16gdzieś

17tu: wysoka temperatura

18gotowe

19cukier puder

20na jaką macie ochotę

Sam tyż mogecie mie znojś:
Kej lubicie ôbrŏzki
Sam znojdziesz moje filmy
Sam znojdziesz moje filmy
Jak lubisz ćwiyrkać, to sam wlyjź
Visit Us
Follow Me
Dastaniecie mejla ze nowymi receptami
RSS




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*