Torta łod Kaufmanna (Tort skromności ;) )

Jak niy mołcie ciyrpliwojści1 do pieczynia, to ani tego niy czytejcie 😉 To niy torta z tych, co to sie pieke biszkopt, wciepnie na niego trocha dżymu, ślagzana2 i fertich3. Jak już fto jednak poświyńci te połra godzin, to efekt je richtig4 zaskakujōncy. Ciymno szokolada, beza, mascarpōne i śliwki moczōne we kōniaku… Robiōłech go 2 razy i za kołżym razem goście go raz-dwa wmōciyli5 😉

Co potrza?

Ciymny biszkopt:

5 jajec

4 łeżki6 mōnki pszynny

1 łeżka kartofylmyjlu7

2 łeżki kakao

5 łeżek cukru

2 łyżeczki proszku do pieczynia

Beza:

6 biōłek

1,5 szklōnki cukru

3 łeżki kartofylmyjlu

2 łeżki likieru cytrynowego abo kōniaku

trocha soli

Kryjma:

500 g mascarpōne

2 gorzke szokolady (po 100 g)

Ślagzana:

125-150 ml śmiytōnki 30 abo 36 %

1 łeżka pudecukru

1 śmiytanfix

Śliwki:

100 g suszōnych śliwek bez pestkōw

keliszek kōniaku abo brandy, abo whisky

keliszek wody

Pieczynie trza sie rozłożyć na 2 dni- nojprzōd biszkopt i beza, a na drugi dziyń kryjmy.

Na samym poczōntku zamoczcie sie tyż w kōniaku z wodōm pokrōne śliwki- jakby co, to mogecie tyż dać 2 keliszki kōniaku i niy dołwać wody.

Tera biszkopt. Rozgrzyjcie sie piec na 165 stopni i przigotujcie sie tortownica- jak mołcie8 tako zamykanoł, to na ta dolnoł czyńść mogecie sie dać piapiōr9 do pieczynioł.

Biołka łoddzielcie od żōłtek i przesiyjcie sie ta mōnka i kakao. Do tych biōłek wciepcie10 trocha soli i ubijcie. Pod kōniec wsypcie tam cuker i dalyj ubijejcie. Po jednym11 wciepujcie żōłtka, potyn12 zmniyjszcie13 łobroty14 i wsujcie15 tam ta mōnka, kakao i proszek. Ubijejcie jeszcze trocha i wlyjcie16 to do ty17 tortownicy- i rajn18 do pieca na 35-40 minut. Jak bydziecie jōm wyciōngać, to odwrōćcie ta forma do gōry dnym i ściepnijcie19 na stōł (ze 20 abo i 30 cm). I niech sie łona20 tera trocha łodpocznie.21

Beza. Ubijcie sie biōłka na beza (wciepcie tam trocha soli). Potyn dejcie tam cuker i ubijejcie, aż sie rozmiyszoł. Na sōm kōniec wmiyszejcie kartofylmyjl i wlyjcie likier abo kōniak. Przigotujcie sie 2 blachy, wyłōżcie na nie papiōr do pieczynioł i odrysujcie na nim 2 kōłka wielkości dna tortownicy. Tera na kołżde kōłko wyłōżcie po pó22 ubityj masy i rozsmarujcie. Na tym kōnsku, kery pódzie na wiyrch, mogecie łeżkōm postawiać take szpice- fajnie bydōm wyglōndac po upieczyniu. Rozgrzyjcie bratruła23 na 180 stopni i wrojście24 tam obydwie blachy- nojlepi we piecu ze termoobiegym. Jak już bydōm we środku, to zmniyjszcie na 100 stopni i niech to tam posiedzi 3 godziny. Po jakimś czasie mogecie tyż na chwila otwiyrać leko tyn piec, żeby uciykła para- połra razy.

A tak minōł dziyń piyrszy.

Na drugi- dziyń fajeru25– przekrejcie biszkopt na pó. Mogecie go tyż leko nawilżyć kōniakym zmiyszanym ze wodōm, yno żebyjście sie potym tōm tortōm niy naprali26.

We gorku abo misce nad wrzōncōm wodōm rozpuście sie te 2 szokolady. Do miski dejcie mascarpōne i zmiksujcie ze łozpuszczōnōm szokoladōm- kryjm je fertich.

We inkszyj misce ubijcie śmiytōnka i dejcie do ni łeżka pudecukru i śmiytanfix.

Teraz sie bierymy do nojważniyjszyj roboty. Na spodek patery abo talyrza idzie placek biszkoptu. Na niego smarujecie połowa kryjmy z mascarpōne i na to wciepujecie połowa śliwek.

Tera przidzie beza, na nia ślagzana i drugi placek biszkoptu. Na biszkopt reszta kryjmy, śliwki i na sōm wiyrch beza. Wrojście to na chwila do lodōwki i… na stōł. Smacznego 🙂

Torta łod Kaufmanna-małe

1cierpliwości

2bita śmietana

3gotowe

4naprawdę

5zjedli 😉

6 łyżek

7 mąki ziemniaczanej

8 posiadacie

9 papier

10 wrzućcie

11 pojedynczo

12 później

13 zmniejszcie

14 obroty

15 wsypcie

16 wlejcie

17 tej

18 do środka

19 zrzućcie

20 ona

21 odpocznie

22pół

23piekarnik

24włóżcie

25uroczystości

26wstawili

Sam tyż mogecie mie znojś:
Kej lubicie ôbrŏzki
Sam znojdziesz moje filmy
Sam znojdziesz moje filmy
Jak lubisz ćwiyrkać, to sam wlyjź
Visit Us
Follow Me
Dastaniecie mejla ze nowymi receptami
RSS




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*