Cukinia na bani (Dynia i przyjaciele)

Cojsik mie korciōło1, żeby sie szczelić na szybko jakoł zupa. We zamrażalce bōła jeszcze staro bania2, na handlu żech kupiōł take fajne małe cukinie, no i jeszcze mioł żech flaszka z włoskimi tōmatami3. Czasu bōło mało, bo zajś trza bōło lecieć na jake nagranie i musza pedzieć, że chyba mi sie udało szczelić ta zupa we 15 minut- niy bōło źle. Jak bania sie rozmrojzi, to łōna4 już je miynkoł5 i bez to niy trza ji tak dugo warzić, ale jak mołcie trocha wiyncyj czasu, to mogecie sie łobrać tōmaty ze skōry i wciepnōńć je do gorka razym ze świyżōm baniōm, a bajecie mieć jeszcze lepszoł zupa. Ło tyj zupie idzie nawet pedzieć, że je wegańskoł- terozki to je przeca modern6 😉

Co potrza:

0,5 kg łobranyj bani

0,5-0,7 kg tōmatōw (abo jedna flaszka pasaty- takigo przeciyru ze tōmatōw, abo i soku)

1 mało cukinia

1 cebula

2 zōmbki czosku

gorść słōnecznika

połra łyżek oliwy

2-3 łeżki oleju kokosowego

połra gałōnzkōw bazylii

sōł i pieprz

2 szklōnki wody

Do gorka wlyjcie oliwa, wciepcie czosnek, pokrōno byle jak cebula i trocha jōm zeszklijcie. Potyn wlyjcie tam flaszka przeciyru abo pokrōne, łobrane ze skōry tōmaty i łobrano bania. Wlyjcie tam trocha wody, dejcie trocha soli, pieprzu, listki bazyli i niech sie to powarzi.

Bez tyn czas na suchoł patelnia dejcie na chwila nasiōna słōnecznika, a za chwila wlyjcie tam trocha łoleju kokosowego (pōnoś łon je nojlepszy do smażynia), a jak go niy mołcie, to moge być tyż oliwa i wciepcie tam pokrōno na małe kōnski cukinia- jak je małoł, to niy trza jyj łobiyrać ze skōry. Jak cukinia zmiynknie, to tyn dodatek już mōmy fertich.

Idymy nazod do gorka ze baniōm i tōmatami. Jak bania je miynkoł, to wejście blynder i wszysko fajnie wymiksujcie, dosmakujcie i fertich. Do talyrza nalyjcie zupa, po wiyrchu7 posypcie cukiniōm i słōnecznikym… i smacznego 🙂

Nojfajniyjsze je w tym to, że ta zupa kryjm mōmy połōnczōno ze chrupiōncōm cukiniōm i słōnecznikym. Je delikatnoł we smaku, ale jak już sie jōm sprōbuje, to ciynżko sztopnōńć8 😉

Cukinia na bani-małe

1korciło; ō- samogłoska w wymowie między o i u

2dynia

3pomidorami

4ona

5miękka

6modne

7na wierzchu

8przestać

Dodaj komentarz

Twój adres email nie zostanie opublikowany. Pola, których wypełnienie jest wymagane, są oznaczone symbolem *