Grochōwka (Grochówka)




 

Na pōniydziałek- jak komu niy łostało[1] nic z niydzieli- werciōłoby[2] sie uwarzić[3] cojś einfachowego[4], co by bōło tōnie- bo to sie czowiek wykosztowoł na tyn niydzielny łobiołd[5]– i nie trza by bōło mudzić[6] bez godzina. To je barzi taki eintopf[7] i jak zjycie porzōndny talyrz taki zupy, to sie nie bajecie[8] łoglōndać za drugim.

 

Co potrza?

 

25 dkg grochu łuskanego

3 kōnski wōsztu[9] –  jak na gwōłt chcecie dać wyndzōnki[10] to dejcie, ale mogecie tyż dać trocha wōsztu i trocha wyndzōnki

jedne opakowanie tzw. włoszczyzny, a tam znojdziecie: marchew, pietruszka, zeler i boryj[11]

prziprawy (jōł tam ich lubia kans[12]): kminek, lubczyk, kozieradka (smakuje trocha jak maggi), majeranek, sōl i pieprz, abo jak sie to dōłwni[13] gołdało: korzynie.

 

Groch zalyjcie wrzōntkym na 15 minut. Wylyjcie ta woda i zalyjcie jeszcze rołz[14] świyżōm. Kajś żech czytoł, że po tym tak niy beczkuje[15] (ze fasolōm je tak samo) Mogecie to zrobić połra godzin pryndzy, ale jak niy mołcie czasu, to zalyjcie tym wrzōntkym na chwila, a potym zarołz mogecie w tym samy garcu, kaj go moczycie, zaczōńć go warzić. W tym czasie pokrejcie wōszt i wciepcie do inkszego gorka abo na patelnia, żeby sie trocha podsmołżōł. Pod koniec na chwila wciepcie tam tyż pokrōno[16] włoszczyzna, a na kōniec w jakim garcu zalyjcie to wodōm. Wciepcie do tego tyn groch- co to sie warzōł w inkszym gorku (mogecie go tyż pryndzy łodcedzić[17]). Dejcie tam teraz te prziprawy- noprzōd dejcie mani[18], a na kōniec mogecie jeszcze trocha tego czy tamtego dociepnōnć, żeby Wōm potyn[19] niy pedzieli, że zupa bōła za słōnoł. Cuzamyn[20] to tam sie niy musi dugo warzić- sprołwćcie[21] czy groch i marchew sōm miynke[22], a jak bandōm, to mōmy to fertich[23]. Moja muter mi padała[24], poczamu[25] żech niy doł kartołfli, bo grochōwka musi być z kartołflōma, a joł tam wola bez. Zamiast tego lubia sie do takego eintopfu zjejś kōnsek dobrego chleba abo jako fajno bōłka- przeca niy trza zawsze warzić jak za starego piyrwy[26]😉 Smacznego!

Grochówka- małe

 

[1]     zostało

[2]    opłaciło

[3]    ugotować

[4]    prostego

[5]    obiad

[6]    marnować czasu

[7]    danie jednogarnkowe

[8]    będziecie

[9]    kawałki kiełbasy

[10]  boczek wędzony

[11]  seler i por

[12]  dużo

[13]   dawniej

[14]   raz

[15]   nie ma się wzdęć

[16]  pokrojoną

[17]  wcześniej odcedzić

[18]  mniej

[19]  później

[20]  razem

[21]  sprawdźcie

[22]  są miekkie

[23]  gotowe

[24]  powiedziała

[25]  dlaczego

[26]  dawniej

 




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*