Zajōnczołki po byku (Wołowe klopsiki w podgrzybkowym sosie)




W tym roku je tyla grzibōw, że aż żołl1 z nich czego niy narychtować2. Mogecie sie zapytać, po czamu3 ôn zamiast fajnego kōnska miysa sie wymyślōł te klopsiki? Żeby sie szło warci4 brać do jedzynia- wołowe w całojści musiałoby sie dusić bez połra godzin, a take klopsiki raz, dwa bōły fertich5. I zawsze jeszcze mogecie postraszyć Wasz bezuch6, że te wołowe kulki to sōm tak po prołwdzie7 ôd byka… 😉

Co potrza?

1 kg mielōnego miysa wołowego

0,5 kg zajōnczołkōw8

1 jajco

1 cebula

200 ml śmietōnki (30 abo 36%)

połra łeżek oliwy

łeżka masła klarowanego

1 łeżeczka majeranku

0,5 łeżeczki tymianku

0,5 łeżeczki czosku niydźwiedziego (abo mogecie tyż dać zōmbek czosku)

keliszek czerwōnego wina

szklōnka wody

trocha mōnki do zagynszczynia zōłzy

sōl i pieprz

Do miysa dejcie9 trocha oliwy, soli, pieprzu i jajco. Ukulejcie małe kulki. Potyn podpiyczcie je na prawie suchyj patelni( niy bydzie tak pyrskać10).

We gorku na maśle i oliwie zeszklijcie cebula, dejcie do tego pokrōne na wiynksze kōnski11 grziby i trocha to posmołżcie. Joł tam grziby myja, choć wiym, że niyftorzi gołdajōm12, że trza je yno pyndzlym leko ôczyścić, ale se tak myśla, że jak ône sōm… pojscane13 bez jakego lisa abo grzibiołrza14, to już wola je umyć 😉

Dociepcie do grzibōw przismażōne klopsy15, prziprawy, nalyjcie wody i niech sie to aby 15 minut powarzi16. Potyn yno jeszcze dejcie tam śmiytōnki (nojlepi jōm pryndzyj zahartować- dać dō ni trocha zōłzy17) i mogecie nasza zōłza trocha zagyńścić mōnkōm (łozfyrlanōm18 we zimnyj wodzie).

Dosmakujcie i biercie sie za jedzynie. Tako zōłza pasuje do klōzek19, nudli, kaszy… Smacznego 🙂

1żal

2przygotować

3dlaczego

4szybciej

5gotowe

6gości

7naprawdę

8podgrzybków

9dajcie

10pryskać

11kawałki

12mówią

13posikane

14grzybiarza

15klopsiki

16pogotuje

17sosu

18roztrzepaną

19klusek




2 Komentarze

Dodaj komentarz

Twój adres email nie zostanie opublikowany.


*