Zajōnczołki po byku (Wołowe klopsiki w podgrzybkowym sosie)

W tym roku je tyla grzibōw, że aż żołl¹ z nich czego niy narychtować². Mogecie sie zapytać, po czamu³ ôn zamiast fajnego kōnska miysa sie wymyślōł te klopsiki? Żeby sie szło warci⁴ brać do jedzynia- wołowe w całojści musiałoby sie dusić bez połra godzin, a take klopsiki raz, dwa bōły fertich⁵. I zawsze jeszcze mogecie postraszyć Wasz bezuch⁶, że te wołowe kulki to sōm tak po prołwdzie⁷ ôd byka… 😉

Co potrza?

1 kg mielōnego miysa wołowego

0,5 kg zajōnczołkōw⁸

1 jajco

1 cebula

200 ml śmietōnki (30 abo 36%)

połra łeżek oliwy

łeżka masła klarowanego

1 łeżeczka majeranku

0,5 łeżeczki tymianku

0,5 łeżeczki czosku niydźwiedziego (abo mogecie tyż dać zōmbek czosku)

keliszek czerwōnego wina

szklōnka wody

trocha mōnki do zagynszczynia zōłzy

sōl i pieprz

Do miysa dejcie⁹ trocha oliwy, soli, pieprzu i jajco. Ukulejcie małe kulki. Potyn podpiyczcie je na prawie suchyj patelni( niy bydzie tak pyrskać¹⁰).

We gorku na maśle i oliwie zeszklijcie cebula, dejcie do tego pokrōne na wiynksze kōnski¹¹ grziby i trocha to posmołżcie. Joł tam grziby myja, choć wiym, że niyftorzi gołdajōm¹², że trza je yno pyndzlym leko ôczyścić, ale se tak myśla, że jak ône sōm… pojscane¹³ bez jakego lisa abo grzibiołrza¹⁴, to już wola je umyć 😉

Dociepcie do grzibōw przismażōne klopsy¹⁵, prziprawy, nalyjcie wody i niech sie to aby 15 minut powarzi¹⁶. Potyn yno jeszcze dejcie tam śmiytōnki (nojlepi jōm pryndzyj zahartować- dać dō ni trocha zōłzy¹⁷) i mogecie nasza zōłza trocha zagyńścić mōnkōm (łozfyrlanōm¹⁸ we zimnyj wodzie).

Dosmakujcie i biercie sie za jedzynie. Tako zōłza pasuje do klōzek¹⁹, nudli, kaszy… Smacznego 🙂