Syrop ze mlycza (Syrop z mniszka lekarskiego)

Musza Wōm pedzieć¹, że w tym roku rychtowołech² go dopiyro piyrszy rołz³, ale tak mi posmakowoł, że cojś mi sie zdołwo⁴, że na wiosna zawsze trza go bydzie robić. Na Ślōnsku na mniszka gołdo⁵ sie mlycz, ale niy mylcie go ze mlyczym zwyczajnym- ôn moł na jednym sztynglu⁶ połra⁷ kwiołtkōw, a mniszek moł pojedyncze kwiołtki, a sztyngel je pusty driny⁸. Trza je zbiyrać we kwietniu abo maju- niyftorzi bez to gołdajōm na tyn syrop majowy miodek.

Taki syrop je dobry na gardło, żołōndek i roztomajte⁹ stany zapalne. Jak sie go robi, to w dōma fajnie wōnio¹⁰ kwiołtkami, a bez zima bydzie idealny do tyju¹¹, ôblōnia¹² ajerkuchōw¹³ abo buchtōw¹⁴. Słodki, ze lekōm goryczkōm i kwaskowatościōm ze citrōłny… dobry jak miōd 😉

Co potrza?

wiela mołcie kwiołtkōw, to tela lyjecie wody- może ździebko¹⁵ wiyncyj:

jo miołech pólitrowy gorczek kwiołtkōw, to poszło tam pó litra wody

na pó litra wywaru przidzie pólitrowy gorczek brōnołtnegto cukru (ôd biydy moge być bioły)

sok ze poły abo jednyj citrōłny

Nojprzōd¹⁶ zbiyrołcie¹⁷ kwiołtki- nojlepi do matariałowyj tasi¹⁸ abo koszyka, potyn trza je wysuć¹⁹ na godzinka abo dwie na bioło płachta²⁰, żeby pouciekały ś nich chrobołki²¹. Gołdajōm²², że tych kwiołtkōw moł sie niy myć, joł żech niy mōł, yno żech im zrobiōł porzōndny dyszcz 😉

Dejcie²³ je potyn do gorka, zalyjcie wodōm i połra minut „powołrzcie²⁴„- choć tak po prołwdzie nojlepi, keby do samego wrzynia niy doszło, bo sie bez to tracōm roztomajte skłodnik. Niyskorzi trza tyn gornek przikryć i ôstawić²⁵ na 24 godziny. Potyn przelołć wywar przez gaza abo jaki kōnsek materiału i richtich²⁶ dobrze wycisnōńć te kwiołtki.

Terołzki pomiyszejcie wywar ze cukrym (1:1).

Ôdparowywanie: joł to robia na patelni, bo moł nojwiyncyj placu²⁷ do parowania. Tak dugo trza to podgrzywać (bez wrzynia), żeby sie z tego zrobiōła kōnzystyncja miodu. Pod kōniec wyciście tam citrōłna: nojprzōd dejcie pó, sprōbujcie, jak tyn syrop smakuje, a potyn zawsze mogecie dać wiyncyj citrōłny. Przelyjcie to na kōniec do wyparzōnych krauzōw²⁸, zakryńćcie, przewrōćcie do gōry dnym i po robocie.

Smacznego 🙂