Chop prōbuje: Sok ze citrōłny i limōnki firmy Limmi

Dostołech¹ do wyprōbowania dwa take soki frimy Limmi. Na poczōntku wejrzołech² na to krytycznie, bo po co mōm używać cojsik³ ze kōncyntratu, jak sie moga kupić citrōłna i jōm wycisnōńć, ale potyn zrobiōłech prōba i zmiyniōłech zdanie. Nojprzōd wycisnōł żech sie limōnka i dlo porōwnania wziōłech Sok ze limonek Limmi (sok ze limōnki ze kōncyntratu: 99,97 %). Tyn drugi rōżni sie tym, że moł we składzie jeszcze olejki eteryczne ze skōrki limōnki i musza Wōm pedzieć⁴, że mie to richtich⁵ zasmakowało. Je tam niystety kōnserwant: pirosiarczyn potasu, ale jak weznymy połra kropek tego soku do szałołtu abo dwie łeżki do guacamole, to niy mo nōm co zaszkodzić. A tyn sōm kōnserwant dołwajōm tyż do wina abo piwa i żołdyn sie nim wtedy niy przejmuje 😉 Za 200 ml idzie zapłacić miyndzy 3,69 a 5,49 i myśla, że to niy je nojgorzi, tym barzi⁶, że jedna limonka kosztuje 1,59 zł. Po otwarciu idzie to trzimać dojś dugo w lodōwce, a jako prziprawa moge zmiynić niyjedne danie: łeżka przed podaniym do jarzynowyj zupy, do bigosu ze cukini, roztomajtych szałołtōw⁷, dań meksykańskich… Mogecie sprōbować 🙂

Sok ze citrōłny⁸ moł we składzie 99,97 % soku ze kōncyntratu, olejki eteryczne i niystety tyn pirosiarczan, ale dziynki niymu mogymy go trzimać dojś dugo we lodōwce, a niyrołz je tak, że kupia citrōłna (niyrołz kosztujōm prawie 13 zł za kg), trocha ji wycisna, dōm do lodōwki, a za dwa dni już niy za fajnie wōnio⁹. Wtedy lepi mieć cojsik takego. Kosztuje miyndzy 4,79 a prawie 6 zł- szukejcie angebōłtōw¹⁰ 😉 Idzie sie tego dać trocha do wody, tyju¹¹, narychtować zōłza¹² do szałołtu (https://chopwkuchni.pl/?p=52 ) abo dać połra kropek do zōłzy vinegrette (https://chopwkuchni.pl/?p=159 ), kapnōńć trocha do ciasta, marynowanego miysa… Mogecie sprōbować i niy bydōm to wyciepniynte¹³ piniōndze 😉