Torta na gyburtstag: śliwka we szokoladzie


Warning: Undefined array key "sfsi_plus_mastodonIcon_order" in /home/klient.dhosting.pl/chopwkuchni/chopwkuchni.pl/wp-content/plugins/ultimate-social-media-plus/libs/sfsi_widget.php on line 1748

Połra miesiyncy do zadku1 żech Wōm ôbiecoł recept na ta torta. Trocha to trwało, ale żejście sie doczekali.

Jedna kōmratka2 padała mi, że przi niyftorych biszkoptach nojlepi je ubijać nawet 15 minut i niyskorzyj nawet niy trza dŏwać do tego proszku do pieczynia. Trocha żech sam pozmiynioł, ale efekt bōł richtich3 dobry.

Co potrza?

6-7 jajec

100 g cukru

30 g kakao

135 g mōnki4

100 g szokolady deserowyj

gorść suszōnych śliwek

małŏ krauzka5 powideł

330 ml śmiytōnki 30% (choć 250 ml tyż styknie6)

250 g mascarpone

Kebyjście sie kedy chcieli kupić jaki gyszynk7, bo go jeszcze niy mŏcie, to sie kupcie robota kuchynnego, kery bydzie Wōm sōm ubijoł jajca. A Wy mogecie sie wypić kawa abo ôbejrzeć trocha serialu.

Tyn biszkopt nojlepi upiyc dziyń pryndzyj8.

Wciepcie jajca ze cukrym do miski i ubijejcie (abo niech tyn robot ubijŏ). Nojprzōd chwila na niskich ôbrotach, potyn pŏra minut na średnich, a na kōńcu aby 8 minut na nojszybszych.

Potyn wmiyszejcie tam pomału kakao i mōnka.

Łozgrzyjcie bratruła na 175 stopni. Wciepcie ciasto do tortownicy (na dōł dŏwōm papiōr do pieczynia). Niech sie piecze bez 30 minut.

Potyn wyciōngcie, ôbrōćcie forma do gōry nogami i ściepcie na jakŏ deska.

Jak biszkopt ochōdnie, to go przekrejcie tak, żeby mieć 3 placki (nojlepi dopiyro na drugi dziyń).

Łozpuśćcie szokolada we kōmpieli wodnyj (miska nad gorkym ze wrzōncōm wodōm).

Ubijcie śmiytōnka (mogecie dać na kōńcu tyż trocha śmiytanfixu).

Na piyrszy placek dejcie powidła, tera połōżcie na nie drugi blat, posmarujcie na nim śmietōnka (ale łostŏwcie sie trocha do strojynio) i na wiyrch przidzie tyn trzeci placek.

Terŏzki bierymy sie za szokolada. Wymiyszejcie jōm mikserym ze mascarpōne i posmarujcie tōm kryjmōm całŏ torta.

Na wiyrchu mogecie poukłŏdać kōnski suszōnyj śliwki, do szpricy dejcie śmiytōnka i zrōbcie niōm jake fajne ornamynty 😉

Tera dejcie ta torta do lodōwki, a potyn już yno „sto lat, sto lat…”.

Smacznego 🙂

1kilka miesięcy temu

2koleżanka

3naprawdę

4mąki

5słoiczek

6wystarczy

7prezent

8wcześniej

Please follow and like us:
Kej lubicie ôbrŏzki
Sam znojdziesz moje filmy
Sam znojdziesz moje filmy
Jak lubisz ćwiyrkać, to sam wlyjź
Visit Us
Follow Me
Dastaniecie mejla ze nowymi receptami
RSS




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*