Miyso wołowe je richtich1 arōmatyczne, a jak sie je podpiecze i narychtuje niyskorzi z tego takŏ ciymnŏ zōłza2, wciepnie tam pŏra grzibōw, prziprawy, trocha śmiytōnki… to już aże sie czowiek robi godny3. Jŏ żech narychtowoł tyn gulasz do buchtōw4, ale super bydzie smakowoł i ze klōzkami, kartŏflōma czy nawet yno ze żymłōm5.
Co potrza?
500 g miysa wołowego (u mie bōł udziec)
gorść suszōnych grzibōw, nojlepi prawdzikōw, a jak je sezōn, to take 2-3 prawdziwki zrobiōm z tyj zōłzy zōłza luksusowŏ 😉
sōl i pieprz
jedna cebula
keliszek czerwōnego wytrawnego wina
2-3 łeżki oliwy
połra6 ziorek jałowca
połra łoztrzaskanych ziorek ziela angelskego
pŏra liści laurowych
1/4 łeżeczki majerōnku
ździebko7 pomelanego kminku
100 ml śmietōnki- nojlepi 30%
ze dwie łeżki mōnki pszynnyj abo kartoflanyj
połra gałōnzek natki pietruszki
Miyso pokrejcie8 na mańsze kōnski i prziybrōnŏćcie na tyglu/patelni, ale niy dŏwejcie go za dużo na rŏz, lepi se ta porcja podzielić na dwa razy. Niyskorzi przeciepcie je do brytfanki abo jakego gorka, dejcie oliwa i pokrōnŏ cebula i niech się ta cebula trocha zeszkli. Potyn wlyjcie sam wino
i wciepcie prziprawy. Na patelnia, na keryj sie podpiykało miyso, wlyjcie trocha wody, kerŏ zbiere te przipieczōne resztki, ale i tyn arōmat pieczōnego miysa i tyż wlyjcie jōm do brytfanki. Terŏzki niech sie ta wołowina aby 1,5 godziny dusi na małym ôgniu. Potyn łozfyrlejcie9 we szolce z wodōm mōnka (pó szklōnki), wlyjcie ku tymu potyn śmiytōnka, dejcie trocha soli i dolyjcie całojść do brytfanki. Niech sie to jeszcze trocha powarzi i zōłza nōm fajnie zgynstnieje. Na kōniec pokrejcie i pociepcie tam natka pietruszki. Gŏdōm Wōm, że to bydzie richtich dobre jŏdło. Smacznego 🙂
1naprawdę
2sos
3głodny
4kluski na parze
5bułką
6kilka
7szczypta
8pokrójcie
9roztrzepcie
Dodaj komentarz