Rozmaryjōnowe polyndwiczki wōniajōnce citrōłnōm (Rozmarynowe polędwiczki pachnące cytryną)

Lubia połōnczynie rozmaryjōnu i citrōłny, jakosik mi sie zarŏz spōmino lato i sie czowiekowi we gowie jaśniyj robi. Polyndwiczki sōm fajnie delikatne, a z takōm arōmatycznōm zōłzōm bydōm idealne niy yno na fajer, ale i na niydzielny ôbiŏd.

Co potrza?

2 polyndwiczki wieprzowe

poła citrōłny

pŏra ziorek czerwōnego pieprzu (a jak niy, to moge być i tyn normalny)

dwie gałōnzki rozmaryjōnu

2-3 łeżki oliwy

keliszek biołego wytrawnego wina

trocha mōnki do zagynszczynia zōłzy

kapka śmiytōnki abo mlyka

sōl

Nojlepi dziyń pryndzyj zamarynować miyso, żeby fajnie przeszło prziprawōma. Niy krajejcie¹ go na kōnski- lepi, żeby polyndwiczka była we całojści. Wyciście sok ze citrōłny, dejcie² ku tymu oliwa, pieprz i rozmaryjōn (niy dŏwejcie soli!). Na drugi dziyń prziypiczcie miyso na suchym tyglu³ ze wszyjskich strōn, a potyn niech sie podusi we „marynacie”, we keryj bōło bez noc i dejcie ku tymu jeszcze keliszek wina (mogecie go pryndzyj wlŏć⁴ na patalnia, na keryj sie przipiykało miyso, żeby sie żŏdne arōmaty nōm niy zmarnowały, a ône to fajnie zebiere⁵). Polyndwiczka je dojś miynko i 30 minut duszynia ji⁶ styknie⁷. Pod kōniec dociepcie sōl. Terŏzki wyciōngcie miyso i przecedźcie ta zōłza⁸, żeby niy bōło za dużo rozmaryjōnu, bo ôn je mocno arōmatyczny.

Łozmiyszejcie we pō szklōnki zimnyj wody płaskŏ łeżka mōnki. Mogecie do tego dać tyż trocha śmiytōnki abo i mlyka i wlyjcie to bez sitko do zōłzy (żeby niy bōło żŏdnych grudkōw) i niech sie to trocha powarzi. Terŏzki mogecie pokrajać miyso na talarki, a potyn wciepcie je jeszcze na chwila do zōłzy, żeby sie trocha zagrzoło. Take miyso idzie zjejś do kartŏfli, klōzek, kaszy abo i ryżu.

Smacznego 🙂