Szałŏt (sałatka jarzynowa)


Warning: Undefined array key "sfsi_plus_mastodonIcon_order" in /home/klient.dhosting.pl/chopwkuchni/chopwkuchni.pl/wp-content/plugins/ultimate-social-media-plus/libs/sfsi_widget.php on line 1748

Receptōw1 na szałŏt je tyla, co czerwōnych cegłōw na Nikiszu i kŏżdy bydzie przeca gŏdŏł, że tyn jego to je tyn nojlepszy. Jŏ niy wiym, czy mōj taki je, a do tego za kŏżdym razym tyż trocha co w nim zmiyniōm 😉 Szŏłŏt robia wtedy, kej warza nudelzupa- sōm take, kere warzōm jōm bez 8 godzin i cały grincojg2 wyciepujōm3, ale mie je go szkoda, warza zupa tak ze 3 godziny i marchew, pietruszka i zeler lecōm potyn do szałŏtu. Te skadniki, to je tako lista do wyboru- szłoby nawet pedzieć, że szałŏt to tako wielko improwizacyjŏ 😉

Co potrza?

uwarzōny grincojg (marchew, pietruszka, zeler)- marchwi na zicher4 bydzie trocha wiyncyj, ale ôna dŏ nōm trocha słodkojści

ôgōrki kiszōne- choć jak niy mŏcie, to mogōm być i kōnserwowe; jak macie 3 marchwie, to mogecie tak dać ze 2-3 średnie ôgōrki

jabko (1-2)- ôno potyn nōm fajnie chrupie

zielōny groszek- moge być ze biksy5, choć fajniyjszy bydzie tyn mrożōny (warzi sie go yno pŏra minut)

3-4 kartŏfle – nojlepi uwarzōne we mundurkach (ze skōrōm) i niyskorzyj6 ôbrane

2-3 jajca- uwarzōne (choć jŏ ostatnio ani jajec, ani kartŏfli żech niy dowoł)

idzie dać i kukurydza, choć jŏ jakosik ostatnio mało kedy żech jōm wciepowoł7

cebula

majōnez (pŏra łeżek tego Waszego ulubiōnego)

łeżeczka mostrichu8

sōl i pieprz

Marchew, pietruszka, zeler, ôgōrki, jabko, kartŏfle i jajca pokrejcie we kostka. Cebula nojlepi pokrŏć, zasypać łeżeczkōm cukru, dać jeszcze łeżka octu i odstawić na chwila… takŏ je do roztomajtych szałŏtōw nojlepszŏ. Potyn trza wszyjsko wymiyszać, doprawić, dać mostrichu i majōnezu- nojprzōd ze 2-3 łyżki, a jak wymiyszŏcie i bydzie go na ôko za mało, to jeszcze trocha wciepcie.

Do takego szałŏtu idealnie smakujōm roztomajte wōszty i karminadle…

Smacznego 🙂

1przepisów

2warzywa rosołowe

3wyrzucają

4na pewno

5puszki

6później

7dorzucałem

8musztardy

Please follow and like us:
Kej lubicie ôbrŏzki
Sam znojdziesz moje filmy
Sam znojdziesz moje filmy
Jak lubisz ćwiyrkać, to sam wlyjź
Visit Us
Follow Me
Dastaniecie mejla ze nowymi receptami
RSS




Bądź pierwszy, który skomentuje ten wpis!

Dodaj komentarz

Twój adres email nie zostanie opublikowany.


*