Szałŏt (sałatka jarzynowa)

Receptōw¹ na szałŏt je tyla, co czerwōnych cegłōw na Nikiszu i kŏżdy bydzie przeca gŏdŏł, że tyn jego to je tyn nojlepszy. Jŏ niy wiym, czy mōj taki je, a do tego za kŏżdym razym tyż trocha co w nim zmiyniōm 😉 Szŏłŏt robia wtedy, kej warza nudelzupa- sōm take, kere warzōm jōm bez 8 godzin i cały grincojg² wyciepujōm³, ale mie je go szkoda, warza zupa tak ze 3 godziny i marchew, pietruszka i zeler lecōm potyn do szałŏtu. Te skadniki, to je tako lista do wyboru- szłoby nawet pedzieć, że szałŏt to tako wielko improwizacyjŏ 😉

Co potrza?

uwarzōny grincojg (marchew, pietruszka, zeler)- marchwi na zicher⁴ bydzie trocha wiyncyj, ale ôna dŏ nōm trocha słodkojści

ôgōrki kiszōne- choć jak niy mŏcie, to mogōm być i kōnserwowe; jak macie 3 marchwie, to mogecie tak dać ze 2-3 średnie ôgōrki

jabko (1-2)- ôno potyn nōm fajnie chrupie

zielōny groszek- moge być ze biksy⁵, choć fajniyjszy bydzie tyn mrożōny (warzi sie go yno pŏra minut)

3-4 kartŏfle – nojlepi uwarzōne we mundurkach (ze skōrōm) i niyskorzyj⁶ ôbrane

2-3 jajca- uwarzōne (choć jŏ ostatnio ani jajec, ani kartŏfli żech niy dowoł)

idzie dać i kukurydza, choć jŏ jakosik ostatnio mało kedy żech jōm wciepowoł⁷

cebula

majōnez (pŏra łeżek tego Waszego ulubiōnego)

łeżeczka mostrichu⁸

sōl i pieprz

Marchew, pietruszka, zeler, ôgōrki, jabko, kartŏfle i jajca pokrejcie we kostka. Cebula nojlepi pokrŏć, zasypać łeżeczkōm cukru, dać jeszcze łeżka octu i odstawić na chwila… takŏ je do roztomajtych szałŏtōw nojlepszŏ. Potyn trza wszyjsko wymiyszać, doprawić, dać mostrichu i majōnezu- nojprzōd ze 2-3 łyżki, a jak wymiyszŏcie i bydzie go na ôko za mało, to jeszcze trocha wciepcie.

Do takego szałŏtu idealnie smakujōm roztomajte wōszty i karminadle…

Smacznego 🙂