Niyftorzi1, jak yno wejrzōm2 na recept ôd Chopa w kuchni, to na zicher3 pedzōm4: co tyn zajś wynŏkwiōł5 😉 Tyn recept prziszoł dō mie bez szporowanie6– miołech gōwka modryj7 kapusty i 4 mańsze8 apfylziny9… co bōło zrobić, przeca10 jedzynie niy moge sie zmarnować. I musza Wōm pedzieć, że to bōła richtich11 dobrŏ idyja 🙂
Co potrza?
gōwka modryj kapusty
3-4 apfylziny
1 czerwōnŏ cebula
łeżka masła
10-15 dkg pokrōnyj we kostka wyndzōnki12
pŏra ziorek ziela angelskego
pŏra listkōw bobkowych13
sōl i pieprz
pŏra łeżek octu balsamicznego
Pokrejcie14 kapusta i wciepcie15 do gorka. Zetrzyjcie skōrka ze jednyj apfylziny, wyciście sok ze wszyjskich i dejcie to do gorka ze kapustōm. Wciepcie tam tyż ziele angelske, trocha soli, pieprzu i liście bobkowe. Terŏzki we otwartym gorku niech sie to warzi, aż kapusta bydzie miynko (sok niech odparuje). Podpiyczcie na jakim tyglu16 wyndzōnka, dejcie dō ni cebula i potyn wciepcie to do gorka ze kapustōm. Terŏzki trza jeszcze dosmakować wszyjsko octym balsamicznym, solōm i pieprzym… a niyskorzyj już yno smacznego 🙂
1niektórzy
2spojrzą
3na pewno
4powiedzą
5wymyślił
6oszczędność
7niebieskiej
8mniejsze
9pomarańcze
10przecież
11naprawdę
12boczku wędzonego
13listków laurowych
14pokrójcie
15wrzućcie
16patelni
