Kupiōłech na angebōłcie1 mlyko kokosowe i trza bōło zarŏzki cojsik wynŏkwić2. To je tak ajnfachowe3 do narychtowania4, że nawet bajtle5 poradziōłyby to uwarzić6 😉
Co potrza?
500 g mielōnego miysa ôd hańdyka
biksa7 mlyka kokosowego
prziprawa curry
zielōny groszek- nojlepszy by bōł taki świyży abo mrożōny (wtedy styknie wiynkszŏ gŏrść), ale idzie tyż ôtworzić biksa i jōm sam wciepnōńć
sznitlŏch8
sok ze poły citrōłny9
sōl i pieprz
masło klarowane
Pomelane10 miyso pomiyszejcie ze curry (tak aby ze poła łeżeczki), solōm i pieprzym. Na tygel11 wciepcie łeżka masła klarowanego i niyskorzyj dejcie tam ukulane12 byle jak małe kulki ze miysa. Jak sie trocha podpiekōm, to wlyjcie ku tymu mlyko, dejcie sok, groszek, curry, sōl, pieprz i niech sie to trocha powarzi. Na sōm kōniec dosmakujcie sie to jeszcze prziprawōma i mogecie już pomału futrować godnych13. Na talyrzu posujcie to jeszcze pokrajanym sznitlŏchym.
Jŏ żech to jŏd ze czerwōnym ryżym i rucolōm, ale do tego idzie sie zjejś nawet klōzki abo yno żymła14. Smacznego 🙂
1promocji
2wymyślić
3proste
4przygotowania
5dzieci
6ugotować
7puszka
8szczypiorek
9cytryny
10zmielone
11patelnię
12uformowane
13głodnych
14bułka
