Karminadle choby po gruzińsku (Klopsiki a’la gruzińskie)

We kuchni gruzińskyj je we receptach¹ kans² bakłażana i ôrzechōw, a mie³ tak jakosik te dwa składniki posmakowały, że kajś⁴ bych je zajś wcis⁵. I tak żech prziszoł⁶ do tych karminadli, choć może by niyftorzi⁷ pedzieli⁸, że to już niy sōm⁹ karminadle, bo przeca¹⁰ bez jajec i wymoczōnyj żymły¹¹ to żołdno¹² kuchara niy robi karminadli, ale joł sie lubia poeksperymyntować i przi warzyniu, i przy wymyślaniu miana¹³.

Co potrza?

2 małe bakłażany

500 g mielōnego miysa ze hańdyka¹⁴ (choć mogecie sie dać tyż wieprzowe abo drobiowe)

1 łeżka mielōnyj kolyndry

2 zōmbki czosku

2 gorście posiekanych ôrzechōw

trocha tartyj bōłki

sōl i pieprz

ôlyj do pieczynia

Bakłażany potrzyjcie na srogich¹⁵ ôczkach na tarle i posujcie¹⁶ solōm. Jak już puszczōm sok, to mogecie je przepōkać.¹⁷ Wciepcie¹⁸ je na chwila na patelnia- niech sie trocha przipiekōm. Ôrzechy mogecie na jakim tygliku¹⁹ uprażyć i pokrajać²⁰ na mańsze kōnski²¹. Do jaki miski wciepcie miyso, bakłażana, ôrzechy, prziprawy, wyciście czosnek i fajnie wymiyszejcie. Ukulejcie karminadle, ôbtoczcie we tartyj bōłce i na ôleju przibrōnołćcie²². Filozofiji sam srogyj niy ma, a take wynołkwiōne²³ karminadle mogecie zjejś ze jakim szołołtym,²⁴ kartołflōma²⁵… abo i same 😉 Smacznego 🙂