Arōmatycznoł zōłza do nudli (Aromatyczny sos do makaronu)

Nudle prziszły dō¹ nołs² ze Włoch, ale terozki³ tak sie sam zadōmowiōły, że ciynżko sie wyforsztelować⁴, że ich sam⁵ niy ma. A że mie sie miyrznie⁶ warzynie⁷ tego samego, to cołki⁸ czas wynołkwiōm⁹ jake nowojści. Niyrołzki¹⁰ wyłajżōm¹¹ tak dobre, że jednak musza zajś¹² dō nich kedy prziś nazod¹³. Ta zōłza tak fajnie wōnio¹⁴ grzibōma i wyndzōnkōm¹⁵, że aże cieknie mi ślinka, jak to pisza.

Co potrza?

600-800 g mielōnego miysa (joł żech mioł wieprzowe ze cielyńcinōm)

100-150 g wyndzōnki

330 ml śmietōnki ( joł żech doł 30 %)

250 ml soku ze tōmatōw¹⁶ (joł mioł nawet taki swojski ôd Teściowyj, ale moge tyż być kupny, yno dejcie pozōr¹⁷, żeby bōł¹⁸ ze świyżych tōmatōw, a niy kōncyntratu)

połra suszōnych borowikōw

sōl i pieprz

2 łeżki majeranku

trocha natki pietruszki

mōnka do zagynszczynia zōłzy

Grziby umyjcie i wołrzcie¹⁹ 10 minut we jakim małym gorczku²⁰– wody styknie tyla, żeby yno je przikrōło. Na patelnia wciepcie²¹ pokrōnoł²² wyndzōnka, a jak sie trocha wytopi, to dociepcie²³ tam miyso. Jak już miyso baje²⁴ leko²⁵ przibrōnołcōne²⁶, to wlyjcie²⁷ tam sok ze tōmatōw, woda, we ftoryj²⁸ warzōły sie grziby, wciepcie pokrōne grziby i prziprawy. Tera niech sie to tak ze 10 minut powarzi. Niyskorzi²⁹ dejcie tam śmiytōnka- pamiyntejcie, żeby jōm pryndzyj³⁰ zahartować, nojlepi, jak wlejecie dō ni trocha zōłzy i zamiyszołcie. Keby Wōm sie nasza zōłza zdoła³¹ za rzołdkoł³², to mogecie jōm zagyńścić mōnkōm- łeżka abo dwie ôzpuśćcie³³ we pó szlōnki zimnyj wody i wlyjcie do zōłzy. Terozki już yno ôstało nōm dosmakowanie³⁴, ôblōnie uwarzōnych nudli i posypanie po wiyrchu³⁵ natkōm pietruszki. Smacznego 🙂