Cieciorkowe ajerkuchy ze miysym (Cieciorkowe naleśniki z mięsem)

Przijechała¹ dō² mie na bezuch³ moja Muter⁴ i niy dojś⁵, że musiała czekać na ôbiołd⁶ do wieczora, to jeszcze na talyrzu dostała wynołkwiane⁷ ajerkuchy. Przi jedzyniu porobiōła⁸ trocha minōw, ale pedziała⁹ na kōńcu, że dobre- po takyj recynzji mogecie¹⁰ zaryzykować.

Styknie¹¹ do rychtowania¹² ajerkuchōw dać inkszyj¹³ mōnki i już mołcie¹⁴ nowy smak- joł¹⁵ żech kaj¹⁶ kupiōł mōnka ze cieciorki i wyszły z tego wyraźne we smaku ajerkuchy. Do filowania¹⁷ miyso ze dodatkami i we niycałe pó¹⁸ godziny jedzynie mołcie na stole.

Co potrza?

Ajerkuchy:

20 dkg mōnki ze cieciorki

2 jajca

trocha soli

trocha jakego ôleju abo masła klarowanego

mlyko i woda- musicie dać tyla, żeby Wōm niy wyszło ani za gynste, ani za rzołdke ciasto

Do filowania:

500 g mielōnego miysa

połra pieczarek

2 zōmbki czosku

łeżka masła klarowanego

paczka kiełkōw na patelnia

200 ml śmietōnki (moge być 18%)

sōl i pieprz

łeżka zielōw prowansalskich

We misce wymiksujcie jajca, dodejcie¹⁹ do tego tak ze szklōnka mlyka, mōnka, ździebko soli i zajś²⁰ wymiyszejcie. Jak baje²¹ za gynste,²² to dejcie trocha wody. Na patelnia kapnijcie ôleju, wlyjcie kelnia²³ ciasta, rozlyjcie jōm rōwno po całyj patelni i uważejcie, żeby sie Wōm te ciasto niy przipołlōło. Jak ajerkuch baje przibrōnołcōny²⁴ ze dwōch strōn, to go przeciepcie na jaki talyrz²⁵ i niech poczeko chwila na filowanie²⁶.

Na patelnia dejcie trocha masła klarowanego, zmielōne miyso, przeciśniynty czosnek, sōl, pieprz i leko²⁷ przipiyczcie. Potyn²⁸ wciepcie tam pokrajane pieczarki, kiełki i ziela prowansalske. Jak już pieczarki zmiynknōm, to wlyjcie śmiytōnka i bierymy sie za filowanie.

Do środka ajerkucha dejcie trocha farszu, ze dwa plastry syra, klapnijcie, podpiyczcie jeszcze leko ze obu strōn na patalni i biercie sie za jedzynie. Smacznego 🙂