Bōłki ze sezamym (Bułki z sezamem)

Chop sie ciepnōł na bōłki. Jymy je prawie dziynnie, a że co chwila słyszymy, że w tych kupnych je kans¹ chymii, to chciołech sie sprōbować, jak smakujōm take swojske². Trocha sie je robi, ale potyn idzie je zamrojzić, a rano wciepnōńć na chwila do bratruły³ i mieć fajnie chrupiōnce  na śniołdanie.

I co jeszcze trza ło nich pedzieć⁴, to to, że je tam tyż mōnka niyoczyszczōnoł- i żytnio, i pszynno, a im mani przetworzōno łona je, tym wiyncyj moł fetaminōw, błōnnika i inkszych składnikōw, po kere niyftorzi łarzōm do aptyki. Bierymy sie za robota.

Co potrza?

1 szklōnka mōnki żytni razowyj

1 szklōnka mōnki pszynny razowyj (graham)

0,5 szklōnki nasiōn sezamu

4 szklōnki mōnki pszynnyj (biołyj)

5 dkg drożdży

3 łeżki masła

2 łeżki soli

1 jajco

2,5 szklōnki mlyka

Mlyko wlyjcie do jakego gorczka, dejcie tam masło i trocha podgrzyjcie- niy za kans, yno, żeby sie te masło rozpuściōło. Mōnki wsujcie do miski, na środku zrōbcie dziura, wlyjcie tam mlyko, wciepcie pokruszōne drożdże (mogecie tyż dać łeżeczka cukru) i łostowcie we ciepłym miejscu, żeby drożdże trocha zaczły robić. Jo niyroz⁵ rozgrzywōm leko bratruła (tak na 50 stopni), wyłōnczōm i wrołżōm⁶ tam miska, żeby sie te drożdże fajnie wygrzoły.

Niyskorzi wsujcie tam sōl, sezam (pamiyntejcie, żeby łostawić go trocha we szklonce na posucie⁷ naszych bōłek z wiyrchu) i wyrōbcie te ciasto. Łostowcie je tera tak na 0,5 godziny, ale pamiyntejcie, że przi taki „drożdżowyj robocie” to niy idzie patrzeć na zygarek, bo niyroz wszysko nōm szybko rojśnie, a niyroz trza czekać prawie godzina, żeby sie nōm te ciasto ruszōło- drożdżowe sie robi tak barzi⁸ na oko.

Przigotujcie sie 2 blachy i połōżcie na nich papiōr do pieczynioł. Jak już widzicie, że tego ciasta zrobiōło sie tak rołz wiyncyj, to mogecie sie brać za kulanie bōłek. Niy biercie go za dużo, ale starejcie sie, żeby wszyske kulki bōły jednake⁹. Nim ta bōłka położycie na blasze, to mogecie jōm tak leko uklackać¹⁰, a jak już wszyske bydōm ukulane, to sie wejście nōż i na pośrodku kołżdyj wyrznijcie krziżyk. Tera zajś trza je odłożyć tak na pó¹¹ godziny w jake ciepłe miejsce, żeby nōm te bōłki trocha urosły.

Jak już bydōm fajnie napuchniynte, to rozgrzyjcie bratruła na 230 stopni (ale bez bōłek we środku), rozfyrlejcie jajco i kołżdo po wiyrchu fajnie nim posmarujcie jakim pyndzlym. Tera jeszcze yno posujcie na nie ta reszta sezamu i na 12-15 minut do pieca- joł żech dołwoł kołżdo blacha osobno. Dejcie pozōr, bo kołżdy piec je inkszy i za piyrszym razym trza te bōłki wachować, żeby sie niy przipołlōły¹². Tera jeszcze yno chwila poczekejcie, żeby trocha ochōdły¹³, trocha masła i… smacznego! 🙂