Chop prōbuje: Syrki śniadaniowe

Tak żech sie ôstatnio¹ myśloł, coby sam tego Chopa w kuchni trocha rozwinōńć². A że niyrołz kupowołech cojsik do jedzynia, a potyn żech tego żałowoł, bo bōło niydobre, to żech prziszoł na tako idyja³, coby te rzeczy prōbować dlo Wołs⁴– ftojś sie musi poświyńcić. Dziyń zaczyno sie ôd śniołdania i bez to żech sie na poczōntek wziōn⁵ za syrki śniadaniowe.

Wybroł żech 4 nojbarzi ajnfachowe⁶, bez dodatkōw, niy spulchniane azotym, richtich⁷ normalne:

• Goldessa Classic z Lidla,
• Delikate klasyczny z Biedronki,
• Łaciaty z Mlekpolu,
• Twój smak z Piątnicy.

Mogecie sie zapytać, czamu sam niy ma taki popularnyj Philadelphii, a jo Wōm powiym, że po piyrsze je dużo droższoł ôd inkszych (miyndzy 4 a 5 zł), w smaku podobnoł je do tych testowanych, a do tego moł w składzie E410 i jo jōm bez to smola⁸.

Niy ma syrka z Hochlandu „Kanapkowy śmietankowy”, bo moł za kans⁹ dodatkowych składnikōw (mączka chleba świętojańskiego, aromaty, guma guar…) i niy ma tyż Bielucha ze Chełma, bo jego piyrszym składnikym je mlyko, a niy syr.

Mōgby sam być jeszcze „Mój ulubiony” z Wielunia, bo moł dobry skład i niy je nojgorszy w smaku, ale żech go niy znod w żodnym¹⁰ okolicznym sklepie.

Bierymy sie za robota:

Goldessa je produkowano we Niymcach, a cołoł reszta we Polsce. Syrek z Biedronki je robiōny bez firma Piątnica, ale rōżni sie trocha na plus ôd ichniego „Twojego smaku”. Cyna w Biedronce i Lidlu jest stałoł, a te inksze to mogōm kosztować od 2,19 aż do 4 zł w jakim małym sklepiku (Twój smak). Tyla na poczōntek, a tak to wyglōndo w zestawiyniu:

Syrek	Cyna i wołga	Skład	Kōnsystyncja	Smak	Ocyna (1-5)
Goldessa Classic z Lidla	2,99 zł 200 g	49,7 % śmietanka, mleko odtłuszczone, sól, kultury bakterii mlekowej	Trocha podchodzi wodōm, mocno krymowy. Dobrze sie smaruje.	W smaku trocha nijaki. Niby czuć trocha syr, ale po takim produkcie bych sie spodziywoł wiyncyj.	2
Twój smak z Piątnicy	od 2,19 zł 135 g	Serek śmietankowy (mleko pasteryzowane i śmietana), sól, białka mleka	Mocno podchodzi wodōm i mo delikatne grudki. Dobrze sie smaruje.	Dobrze czuć syr, niy za kwaśny i niy za słōny. Leko śmiytankowy.	4
Delikate klasyczny z Biedronki	2.99 zł 200g	Serek śmietankowy, sól, białka mleka.	Średnio podchodzi wodōm, krymowy , dobrze sie smaruje i fajnie rozpuszczo w gymbie11.	Delikatny, wyraźnie czuć syr, śmiytōnka tyż. Niy za słōny i niy za kwaśny.	4,5
Łaciaty z Mlekpolu	od 2,59 zł 135 g	Serek śmietankowy, białka mleka, sól.	Niy podchodzi wodōm, richtich krymowy i fajnie sie nim smaruje sznity12.	Łagodny, wyraźnie czuć syr, nojbarzi śmiytōnkowy. Delikatnie słōny.	5

I tak to wyglōndo. Zawsze sie godało, że co z Niymiec, to lepsze, ale jak idzie o syr twarogowy, to Niymcy sōm jednak daleko do zadku.

Smacznego 🙂