Chop prōbuje: Szinka w plastrach

Szinka bez richtich¹ dugi² czas (niy yno dlo Ślōnzokōw) bōła³ na stole yno⁴ ôd świynta. Dziś to sie zmiyniōło, niby narzykōmy, że niy ma na kōncie piniyndzy, ale jak sie otworzi lodōwka, to tam sie te pōłki aże uginajōm. Niystety, żeby znojś⁵ jedzynie dobryj jakości, to sie trza niystety naszukać i naprōbować. Musza Wōm pedzieć, że prōbowanie tych niyftorych szinek- a barzi⁶ by szło pedzieć⁷, że wyrobōw szinkopodobnych- niy bōło leke⁸, ale żech sie poświyńciōł 😉

Wziōn żech na warsztat 5 szinek i zarozki⁹ moga Wōm pedzieć, że kebyjście na jakim handlu mieli takego chopa, kery¹⁰ sprzedołwo swoje wyroby abo mogli sie kupić kōnsek surowyj wyndzōnyj szinki i jōm potyn we bratrurze¹¹ przipiyc, to sie za te sklepowe w plastrach niy chytejcie.

Mało szinki w szince, woda, woda, woda, sōl i roztomajte inksze składniki. Tych niyftorych to już na zicher nigdy niy wciepna do koszyka, przi dwōch idzie zaryzykować. I zajś szłoby pedzieć: piyrwy to bōła szinka 😉 Wszyjske niystety majōm jako substancja kōnserwujōnco azotyn sodu, kery za zdrowy niy jest, ale nawet jak sami robiymy szinka, to i tak jōm pyjklujymy¹², a wtedy i tak na talyrz nōm wjyżdzo azotyn sodu. Ważne je to, co by go niy jejś za kans¹³.

A jako to sam wyglōndo dokładniyj?

Szinka	Cyna i waga	Skład	Kōnsystyncja	Smak	Ocyna (1-5)
Morliny, Szynka gotowana (je sam tyż taki dopisek „Szynka wieprzowa parzona z połączonych kawałków mięsa z dodaną wodą”- nic yno sie przewrōcić 😉 )	Od 5,89 zł 100 g (prawie 60 zł za kg!)	Miyso wieprzowe 90%, woda, sōl, glukoza, trifosforany, białko wieprzowe, wzmaczniacz arōmatu, przeciwutleniacz (askorbinian sodu), arōmaty, substancja kōnserwujōnco (azotyn sodu).	Taki twardawy galert, trocha keby jejś szinkowe miśki. Niy mo struktury miysa.	Prawie niy mo arōmatu, jak tako richtich tōnio szinka z puszki, a co na zicher czuć, to sōl. Myślołech, że Morliny takego marnego produktu niy wypuszczōm.	1
Sokołów, Szynka Basiuni	Od 4,75 zł 140 g (ok 32 zł/kg)	Miyso wieprzowe ze szinki 83%, woda, sōl, stabilizatory: E451, E407, białko sojowe, maltodekstryna, glukoza, cuker, hydrolizat białka słōnecznikowego, askorbinian sodu, ekstrakt drożdży, arōmaty, ekstrakty przipraw, azotyn sodu.	Dojś chudo, mocno wilgotno, choć już niy tako galaretowato. Niy czuć struktury miysa.	Trocha żołl mi tych, kerych „Basiunia” futrowała14 tōm szinkōm 😉 Słōno, smak: jak PRLowsko puszka ze szinkōm.	2
Dulano, Szynka wieprzowa Lidl	4 zł 150 g (30 zł/kg)	95 % miyso wieprzowe, sōl, glukoza, stabilizator: difosforany; ascorbinian sodu, azotyn sodu.	Barzi podobno do prawdziwego miysa, niy tako galaretowato.	W smaku niy ma rewelacji, jak tako szinka z puszki, kero my piyrwy pod namiotym zarli15.	3
Krakus, Szynka polska	Od 6,99 zł 140 g (50 zł/kg)	Miyso wieprzowe 83% (choć na opakowaniu je tyż napisane, że 100 g produktu je ze 100 g miysa), woda, sōl, glukoza, białko wieprzowe, stabilizator (trifosforany), askorbinian sodu, arōmaty, azotyn sodu.	Struktura miysa niy za mokro. Mo tyż dojś naturalno farba16.	Idzie pedzieć, że ôna stoła kole szinki. Mo jakiś arōmat- mōm nadzieja, że niy yno sztuczny. Delikatno, ale dojś słōno. Idzie zaryzykować, ale bez fajerwerkōw.	-4
Kraina wędlin, Szynka krucha Biedronka (robiona przez zakłady w Sokołowie)	6,49 zł 180 g (36 zł/kg)	Miyso wieprzowe ze szinki (100g narychtowane ze 100 g miysa), sōl, białko wieprzowe, glukoza, cuker, arōmaty, ascorbinian sodu i azotyn sodu.	Sam podobnie, jak u Krakusa. Czowiek patrzy i widzi kōnsek miysa. Niy za wodnisto i tyż sie niy rozlatuje za kans.	Chude miyso, delikatny smak, ale tyż dojś słōno. Fajnie wōnio- choć to moge być yno kwestia dodania arōmatu, ale idzie jōm bez problymu dociepnōńć do pizzy abo jakego szałołtu. Choć żeby stykła17 na świynta- co to, to niy.	-4

Nojciekawsze je to, że Sokołōw zrobiōł Biedrōnce cojsik lepszego, niż sōm sprzedowo pod swojōm nazwōm- że tyż ich niy ma gańba¹⁸.

Nojlepi to sam niy wyglōndo, możno trza poszukać u jakego masołrza 😉