Abgeryjta ze Paniōwek (Babka z Paniówek)

Zarozki¹ na poczōntku² Wōm powiym, że we mianie³ niy idzie ô⁴ nazwa składnika, ale wiejś ze keryj⁵ żech tyn recept⁶ dostoł⁷. Kamrat⁸ ôd moji Mutry⁹ mi padoł¹⁰, że tam majōm nojfajniyjesze abgeryjty i do tego jeszcze spaczoł¹¹ mi na nie recept. Joł żech musioł tyż troszka pozmiyniać i nawciepowoł¹² żech tam bakaliōw richtich¹³ na bogato, ale Wy mogecie sie jōm zrobić yno ze skōrkōm ze citrōłny i rodzynkami abo i bez dodatkōw. Recept je trocha podobny, do moji „Babki ze starego receptu” ( http://chopwkuchni.pl/?p=421 ), ale aby widać, że te stare recepty sie niy tracōm, a my cołki¹⁴ czas lubiymy maszkycić.¹⁵

Co potrza?

500 g mōnki pszynnyj

250 g masła

5 jajec

150-250 g cukru (joł żech doł mani¹⁶, ale jak lubicie barzi słodke…)

cuker waniliowy (joł żech doł arōmat, bo to tera trudno znojś cuker waniliowy, bo yno wszyjske sōm wanilinowe- jedna literka, a rōżnica srogoł¹⁷)

szklōnka mlyka

15 g proszku do pieczynia

Bakalie: joł żech doł płatki ze mandli¹⁸, rodzynki, morele, kandyzowane wiśnie i kandyzowany citrōnat¹⁹, ale mogecie sam wciepnōńć²⁰ jake yno²¹ bakalie lubicie i baje²² to już Wasza wersja tyj abgeryjty ze Paniōwek

Masło, cuker, cuker waniliowy i żōłtka (wciepowane po jednym) pouciyrejcie na gładkoł masa- joł to robioł mikserym i wciep żech wszyjske żōłtka na rołz²³, bo żech je zgniōły²⁴ 😉

Do tego przidzie mōnka, proszek do pieczynioł, mlyko i ubite na piana biołka. Pomału sie to rozmiyszejcie, wlyjcie do formy- mogōm być 2 mańsze²⁵ podłużne, jedna wiynkszoł abo ôkrōngłoł²⁶.

Bratruła²⁷ rozgrzyjcie na 180 stopni i wrojście²⁸ tam nasza abgeryjta na godzinka. Pod kōniec mogecie jōm dziubnōńć jakōm²⁹ wykałaczkōm i ôbejrzeć, czy sie niy kleji dō ni jeszcze surowe ciasto. Jak bydzie niyôbklejōno, to wiycie, że mogecie abgeryjta wyciōngać ze bratruły, ôchōdzić³⁰ i brać sie za jedzynie. Smacznego 🙂