Babeczki markwiowo-żytnie ze figōm (Muffiny fitness)

Te dochtory¹ marudzōm, że jymy za dużo biołyj mōnki i bez to żech sie pomyśłoł, że trza by bōło tyż sam cojś upiyc do zdrowotnojści- jak w ogóle idzie pedzieć, że słodkojści sōm zdrowe. Mōmy sam fetaminy² ze markwi, mōnka żytnio razowo i do tego żech jeszcze doł cojsik takego, jak zarodki pszynne- normalnie jak rychtujōm³ ze pszynicy biołoł mōnka, to je wyciepujōm, a łone majōm wiyncyj solōw mineralnych i fetaminōw, jak⁴ całe ziorko. To trocha tak, keby jako kobiyta sie kupioła nowo kecka⁵, łostawiōła sie w dōma z ni yno pasek, a ta reszta by wyciepła. Bez to trza pamiyntać, żeby jejś⁶ tyż trocha tych niyprzetworzōnych czyńści zboża. Niy bōjcie sie, że tam driny⁷ sōm yno same dziwności, bo trocha szokolady tyż tam je- to przeca mo być do ludzi, a niy do cudokōw.

Co potrza?

4 jajca

1 szokolada

4 wiynksze markwie⁸

1 szklōnka mōnki żytni

1 szklonka zarodkōw pszynnych (kebyjście ich niy mogli znojś, to mogecie dać pszynnyj razowyj abo- no trudno- normalnyj pszynnyj)

0,5 – 1 szklōnki brōnołtnego cukru (zależy łod tego, jak mocno chcecie je mieć fitness)

1,5 łeżeczki proszku do pieczynioł

bojtlik⁹ figōw

ździebko¹⁰ chili

ździebko soli

4-6 ziorka ziela angelskego (roztrzaskane we moździerzu)

2 łeżki oliwy

2 łeżki masła

Szokolada rozpuście w jakim gorczku abo misce nad wrzōncōm wodōm. Wciepcie tam tyż te 2 łeżki masła. Jajca zmiksujcie ze cukrym. Niyskorzi¹¹ dejcie tam mōnka, zarodki, rozpuszczōno szokolada, oliwa, potarte markwie, prziprawy i wszysko dobrze wymiyszejcie. Rozgrzyjcie sie piec na 180 stopni. Przigotujcie sie forymki na muffiny- nojlepi take mańsze. Do kołżdyj dejcie łeżka ciasta (żeby wiynksze pó¹² forymki bōło połne- ja, wiym, że połōwki zawsze sōm równe, ale przeca i tak wszyscy wiycie, o co sam¹³ idzie) i wciście po pó figi. Potyn wrojście te babeczki do pieca na 20 minut, żeby sie tak fajnie przibrōnołciōły¹⁴. Niyskorzi niech sie leko ochōdzōm i… na zdrowie 🙂