Cojś trza upiyc[1], ale niy[2] chce nōm[3] sie ekstra lecieć do sklepu. Czowiek[4] sie tak rozglōndo[5] po kuchni i kōmbinuje, z czego by sam co wymyślić. Mōm[6] 3 banany. No to szukōm przepisu. Jakiś mōm, ale niy do końca mi się podoboł.[7] Myśla, przerobiōm,[8] ale i tak musza iś[9] po cuker, bo sie skōńczōł.[10] Na szybko to czowiek wszysko robi i tu jeszcze skōńczōła sie mōnka[11] pszynno. Mōnkōw roztomajtych[12] mōm całoł krzinka[13], to bōło[14] w czym wybiyrać. A po czamu niy kukurydzianoł? Jak już babeczki bōły we forymkach, otwiyrōm befyj,[15] wyciōngōm rynka[16] po biołoł szokolada[17] i okazuje sie, że ftojś jōm zezar![18] Dobrze, że sklep mōm blisko 😉
Co potrza?
3 banany
100 g masła
0,5 szklōnki cukru
3 jajca
0,5 szklōnki mōnki pszynny
0,5 szklōnki mōnki krupczatki
0,5 szklōnki mōnki kukurydziany
skōrka ze jednyj citrōłny[19]
1,5 łyżeczki proszku do pieczynioł
150 g biołyj szokolady
Łoddzielcie biōłka[20] łod żōłtkōw. Do biōłek wciepcie trocha soli i ubijejcie. Na kōniec wsypcie tam tyż cuker. W inny[21] misce posztamfujcie[22] banany i pomiksujcie z rozpuszczōnym masłym. Zrōbcie sie to tymi samymi łopatkōma,[23] to bajecie[24] mieć mani pōmywania.[25] Włōnczcie sie piec na 170 stopni. Tera idymy nazod[26] do tych ubitych biōłek. Wciepujcie[27] po jednym żōłtka i miksujcie na trocha mańszych[28] obrotach. Dejcie[29] tam te banany ze masłym, skōrka ze citrōłny i na kōniec przesiōne[30] mōnki ze proszkym do pieczynioł. Przigotujcie sie forymki- mie[31] wyszło 16 babeczkōw. Dejcie do kołżdyj[32] tego ciasta- tak 2/3 forymki. Na kōniec wciście[33] tam tyż kostka biołyj szokolady i do pieca na 25-30 minut.
Smacznego 🙂
[1] coś trzeba upiec
[2] nie
[3] nam, ō samogłoska w wymowie pomiędzy o i u
[4] człowiek
[5] rozglonda
[6] mam
[7] podoba
[8] przerabiam
[9] iść
[10] skończył
[11] mąka
[12] różnych
[13] całą skrzynkę
[14] było
[15] kredens
[16] wyciągam rękę
[17] biała czekolada
[18] ktoś ją zjadł
[19] skórka
[20] białka
[21] innej
[22] rozgnieść
[23] łapatkami
[24] będziecie
[25] zmywania
[26] wracamy
[27] wrzucajcie
[28] mniejszych
[29] dajcie
[30] przesiane
[31] mi
[32] każdej
[33] wciśnijcie
Dodaj komentarz