Niyrŏz chciałoby sie kołŏcza, ale niy zarŏzki srogŏ blacha, jak na wesele. Cylowołech barzi we tortownica. Do tego trza jeszcze bōło uratować pŏra jabek i już recept bōł prawie fertich. A na wiyrchu, wiadōmo- kans posypki, bo ôna we kołŏczu je nojważniyjszŏ 😉
Co potrza?
200 g mōnki
1 jajco
1/4 kostki masła
1/3 szklōnki cukru
1/5 kostki drożdży (20 g)
1/2 szklōnki mlyka
ździebko soli
3-4 jabka
ździebko cimtu
łeżeczka masła klarowanego
posypka:
10 dkg masła
10 dkg mōnki
8-10 dkg cukru
ździebko proszku do pieczyniŏ
Przesiyjcie sie mōnka do jaki srogyj1 miski. Pośrodku zrōbcie dziura, wsujcie tam cuker, pokruszcie drożdże i zalyjcie to letnim mlykym. Terŏzki trza poczekać, aże drożdże napocznōm robić- dejcie im tak aby 10-15 minut. Potyn wlyjcie tam łozpuszczōne2 masło(leko ochōdzōne), jajco, ździebko soli i mogecie sie zabiyrać za wyrŏbianie. Nojlepi bydōm mieli ci, kerzi3 majōm robota kuchynnego, niech ôn sie bez 15 minut wejźnie za wyrŏbianie ciasta, a Wy mŏcie czas na kafyj abo tyj. Ci, kerzi niy majōm robota, muszōm bez aby 10 minut wyrŏbiać to ciasto (ugniatać, miyszać, ściskać), a jak już widzicie, że napoczynŏ Wōm odchodzić ôd palcōw, to mogecie sie zrobić chwila pauzy, przikryć ciasto jakōm uciyraczkōm4 i niech aby bez 30-45 minut wyrŏstŏ we ciepłym miejscu. Idzie tyż wrajzić je do bratruły, kero trocha pryndzyj łozgrzejecie (na 50 stopni i potyn już wyłōnczcie).
Jabka obiercie, pokrejcie we plasterki i razym ze masłym, cimtym dejcie je na tygiel. Niech sie trocha podpiekōm.
Ciasto przełōżcie do nasmarowanyj masłym formy, na wiyrch wciepcie leko ochōdzōne jabka i terŏzki czas na posypka. Wciepcie do miski skłodniki posypki i wyrōbcie na jednolitŏ masa… narychtowanie posypki je richtich ajnfachowe.
Na jabka połōżcie posypka i wrojście kołŏcz do bratruły i włōnczcie jōm na 180 stopni.
Niech sie tam wygrzeje bez godzina, a potyn… mogecie stawiać na kafyj 🙂
Smacznego 🙂
1dużej
2rozpuszczone
3którzy
4ścierką
