Portugalskŏ smażōnka ze dorszym (Bacalhau à Brás)

We rajzowaniu^¹ fest lubia nowe smaki. Prōbuja jakegoś dania tam, kaj^² sie urodziōło, a niyskorzyj^³ jada do dōm i wynŏkwiōm^⁴ cojsik podobnego. Bacalhau à Brás- dorsz ze kartŏflōmi i jajcami to na zicher^⁵ bōło jedzynie dlo tych, kerzi^⁶ niy mieli kans pijyndzy^⁷ we portmanyju^⁸. Ajnfachowe^⁹, wartko^¹⁰ sie to rychtuje^¹¹, ale smakuje richtich^¹² dobrze.

Co potrza?

500 g fileta ze dorsza

500 g obranych kartŏfli

4-5 jajec

1 cebula

4-5 zōmbkōw czosku

sōl i pieprz

1/4 szklōnki oliwy (abo pó na pó ze masłym klarowanym)

natka pietruszki

czorne oliwki

Kartŏfle pokrejcie^¹³ we kostka abo słupki i podpiyczcie we oliwie na jakim wiynkszym tyglu^¹⁴. Jak kartŏfle zmiynknōm, to przeciepcie^¹⁵ je na jaki talyrz, na patelnia dejcie pokrōnŏ cebula, wyciśniynty czosnek, a chwila niyskorzyj pokrōnŏ^¹⁶ abo potarganŏ na mańsze kōnski ryba. Mogecie tyż sam dociepnōńć trocha soli i pieprzu. Jak już ryba bydzie upieczōnŏ, to wciepcie tam nazod^¹⁷ kartŏfle i wbijcie do tego tygla tyż jajca. Jak jajca bydōm ściynte, to mogecie to jeszcze dosmakować^¹⁸ solōm i pieprzym i wołać familijŏ do stołu. Na wiyrch idzie posuć^¹⁹ pokrōnyj pietruszki i pŏra czornych oliwek. Smacznego 🙂