Kej żech sie ôstatnio smykoł1 po Wynecji, to widziołech, że ôni tam majōm take małe kreple2 ze rodzynkōma i orzechami pinii. Niyrŏz je tyż nadziywajōm jakōm kryjmōm i rychtujōm bez tych orzeszkōw, ale wtedy podstawa to krepel ze rodzynkōma. Wiym, że je kans3 ludzi, kerzy- jak yno przeczytali „rodzynkōma”- to zarŏzki pociepli4 hyndik5 abo skludziyli6 sie za zeslym7. Mogecie te kreple narychtować bez rodzynkōw i bez orzechōw ze pinii- jak żech ôbejrzoł, wiela ône kosztujōm, to żech sie je lajstnōł8 yno skuli9 Tustego Czwortku. Zamiast nich idzie tyż dać mandle10 abo i słōnecznik, kery trocha podobnie smakuje.
Co potrza?
250 g mōnki
12,5 g drożdży (1/8 kostki)
1/3 szklōnki mlyka
40 g masła
40 g cukru
1 sroge11 jajco
25 g grappy abo kōniaku
laska wanilii abo arōmat waniliowy (nojważniysze, żeby niy sztuczny)
60 g rodzynek (mogecie je pryndzyj12 zamoczyć we tyj grappie)
50 g orzechōw pinii (słōnecznika abo mandli)
ździebko13 soli
olyj do smażyniŏ
pudecuker do posucia14 po wiyrchu
Mōnka wsujcie15 do miski, na postrzodku16 zrōbcie dziōra, dejcie17 tam cuker, drożdże, i letnie mlyko. Jak drożdże sie obudzōm i weznōm do roboty, to wciepcie ku tymu łozpuszczōne masło, jajco, sōl i wyrŏbiejcie rynkōm abo robotym kuchynnym tak dugo, aże sie zrobi z tego jednolitŏ masa i napocznie ôdchodzić od palcōw. Niyskorzyj wmiyszejcie tam rodzynki, orzechy i wlyjcie grappa (kōniak). Potyn trza to przikryć jakōm uciyraczkōm18 i ôdstawić we jake ciepłe miejsce. Jak ciasta bydzie aby rŏz wiyncyj, to mogecie brać łyżkōm kōnski wielkości orzecha włoskigo, ukulejcie ś nich19 kreple i wciepcie do łozgrzōnego oleju. Jak sie fajnie przibrōnŏcōm, to je wyciōngcie na papiyrowy ryncznik, żeby trocha tyn olyj do niego wsiōnknōł. Terŏzki już yno trocha pudecukru, kafyj i… smacznego 🙂
1włóczył
2pączki
3dużo
4wyrzucili
5telefon komórkowy
6schowali
7fotelem
8pozwolić na coś
9przez
10migdały
11duże
12wcześniej
13szczypta
14posypania
15wsypcie
16na środku
17dajcie
18ścierką
19z nich
