Kreple ze dziurōm (Oponki)

Pamiyntōm, że jak żech bōł bajtlym,^¹ to moja Muter^² co chwila piykła te opōnki- te barzi ślōnske miano to do mie prziszło dopiyro tera, ale tak żech mu popszoł,^³ że już opōnki pódōm^⁴ na bok. Robi sie je szybko, nie trza sie wykosztować i bez to, jak piyrwy bez chałpa^⁵ sie nōm przewijało kans^⁶ modych ludzi, co to sōm durś godne^⁷, to moja Muter miała na nich dobry knif^⁸– niyftorzi do dziesiej te kreple pamiyntajōm. Przidajōm sie nōm łone niy yno na Tusty Czwortek, a jak już fto ich rołz sprōbuje, to już tak gibko^⁹ ich niy zapōmni 😉

Co potrza?

30 dkg biołego syra

30 dkg pszynnyj mōnki

2 jajca

cuker waniliowy abo trocha arōmatu

szklōnka cukru

1 łeżeczka sody oczyszczōnyj

1 łeżka masła

2 łeżki wōdki abo łoctu^¹⁰

łolyj do pieczynia^¹¹

pudecuker^¹²

Tyn syr mogecie^¹³ sie przepresować, ale styknie jak go yno trocha posztamfujecie.^¹⁴ Wciepcie wszyske składniki (bez wōdki) do miski i wyrōbcie. Keby^¹⁵ Wōm sie to za kans klejōło, to dosypcie sie trocha mōnki. Jak już bydziecie mieli te ciasto wyrobiōne na jednolito masa, to wlyjcie tam jeszcze te 2 łeżki wōdki abo łoctu- ale joł bych Wōm radziōł jednak tyn sznaps,^¹⁶ bo przeca i tak te wszyske procynty sie przi pieczyniu potracōm. Terozki sie przigotujcie jako stolnica (abo jak to piyrwy gołdali: biyrkownica), nudelkula^¹⁷ i wywałkujcie sie te ciasto tak rube¹⁸ na 1 cm. Tera sie przigotujcie szklōnka i keliszek. Nojprzōd wycinejcie w tym cieście te kōłka szklōnkōm, a pośrodku sie zrōbcie tako dziurka ze tym keliszkym. Te małe łokrōgłe kulki tyż mogecie sie łostawić i upiyc. Do pieczynia sie wejście¹⁹ wiynkszy gornek i nalyjcie tam łoleju- tak ze pó²⁰ litrowyj flaszki. Nojprzōd sie narychtujcie^²¹ te wszyske kreple, a dopiyro potyn bajymy^²² je piyc- wciepować na rozgrzōny łolyj, bo łone tak szybko sōm fertich,^²³ że to trza cały czołs stoć przi tym piecu i je przewrołcać, żeby sie niy przipołlōły. Kebyjście w dōma mieli kogo do pomocy, to Wy mogecie sie wałkować, a tyn Wasz pomager^²⁴ niech piecze. Jak już wszyske bydōm fajnie przibrōnołcōne, to je yno jeszcze posypcie pudecukrym i smacznego 🙂