Pierniki (na północ i wschód od Śląska występują pod taką samą nazwą ;)

Roztomajte mōndre¹ ludzie sie spiyrajōm,² fto³ wynalołz pierniki. Joł tam to smola⁴ i wia yno,⁵ że tyn recept⁶ dała moji Mutrze⁷ pani Truda, a ta zajś dostała go ze 40 lołt⁸ tymu łod jaki kōmratki we robocie, a łod kogo ta go miała, to już wiy tera yno sōm Pōn Bōczek. Przez lata piykła⁹ je moja Muter, a w tym roku joł¹⁰ żech sie wziōn¹¹ za robota. Już na drugi dziyń bōły miynke,¹² a co to dopiyro bydzie na Wilijoł…¹³

Co potrza?

1,5 kg mōnki pszynny
250 g masła
75 dkg cukru
6 płaskich łyżeczek sody oczyszczōnyj
3 łyżeczki łoctu¹⁴
3 opakowania prziprawy do piernikōw (nojlepi niy tyj nojtōńszyj), a kebyjście chcieli jōm narychtować samymu, to sam znojdziecie recept: https://chopwkuchni.pl/?p=1826
0,5 kg miodu sztucznego (Ōłma¹⁵ padała,¹⁶ że ze prawdziwym sōm twarde, choć joł tam doł tyż trocha prawdziwego- do smaku- i bōły miynke)
10 dkg kakao
5 jajek
pó¹⁷ szklōnki mlyka¹⁸

Masło i miód dejcie¹⁹ do gorka i na małym łogniu niech sie z tego zrobi syrop- uważejcie, żeby sie za mocno niy przibrōnołciōło.²⁰ A we srogyj²¹ misce pomiyszejcie²² sie: mōnka, kakao, cuker i prziprawy. Potyn zrōbcie sie tam małoł²³ dziura, wsujcie²⁴ tam soda i polyjcie jōm²⁵ łoctym- bydzie sie fajnie warzōło.²⁶
Pośrodku tyj miski wbijcie jajca, wlyjcie mlyko i ochōdzōny²⁷ syrop. Tera sie zacznie zabawa ze urołbianiym.²⁸ Nojprzōd²⁹ urobiejcie to we środku i pomału się dobiyrejcie mōnki ze bokōw, aż ze wszyskego zrobi sie Wōm tako srogoł błyszczōnco kula. Tera dejcie ji trocha odpocznōńć, zrobcie sie tyju³⁰ abo kawy i zaro jadymy dali³¹ 😉
Piec włōnczcie na 180 stopni, przigotujcie sie ze 2 abo 3 blachy (dejcie na nie papiōr do pieczynioł), trocha mōnki do podsypywania, nudelkula³² i jako stolnica. Wejście sie kōnsek³³ ciasta, posypcie na stolnica i nudelkula trocha mōnki i rozwałkujcie sie te ciasto tak na 0,5 cm. Tera powyciskejcie sie w nim jake tam mołcie³⁴ forymki, pierniki na blacha i do pieca  na 8-12 minut (wszysko zależy łod pieca). Dejcie pozōr,³⁵ żeby niy bōły³⁶ za ciymne. Do ciasta, co Wōm zostało po wyciśniyntych piernikach, dobiercie sie trocha nowego i jedziecie dalyj z tōm robotōm.
Jak już wszyske sōm³⁷ upieczōne, to sie chwila odpocznijcie, a potyn lukrowanie i strojynie.
Luker to cuker puder i woda abo sok ze citrōłny.³⁸ Dejcie pozōr, żeby niy bōł za rzołdki,³⁹ bo Wōm spłynie i bydziecie mieć kans⁴⁰ ciarajstwa.⁴¹ Mogecie tyż dodać do lukru kakao- to bajecie mieć ciymniyjszy. Mogecie tyż te pierniki sie czym na wiyrchu posuć⁴²– knōcikōma⁴³ abo czym tam mołcie. Moja Teściowo dołwo na szklōnka cukru pudru jedne biōłko i to miksuje. Tyn luker je potyn taki fajnie bioły. Kōniec tego czytania, biercie sie za robota 😉