Szokoladowy maszkyt na gibko (Ekspresowe ciasto czekoladowe)

Niyrołz¹ chce nōm² sie czego słodkego, ale sie czowiek myśli: dlo jednego abo dwōch sie niy opłaci piyc, za kans³ tego bydzie, sie zmarnuje i take tam inksze⁴. Moja Kobiyta⁵ terozki niy jy cukru- post sie robi, a mie aże skryncało za słodkim, a niy chciało mi sie kupować, bo to trza szporować⁶ i żech prziszoł na tako idyja⁷. Tego ciasta je niy za kans, a dlo jednego do kafeju⁸ to i na trzi dni styknie⁹. To je cojsik pomiyndzy browni a murzynkym. Niy moł¹⁰ tego zokalca¹¹ jak browni, ale tyż niy je puchate jak murzynek. Fajnie wilgotne, niy za słodke… biercie sie za robota 😉

Co potrza?

3 jajca

80-100 g cukru

120 g szokolady (tela mi sie nazbiyrało z tych napoczyntych ze szranku 😉 )

100 masła

120 g mōnki pszynnyj

ździebko soli dlo złōmania smaku

Masło ze szokoladōm ôzpuśćcie¹² we jakim gorczku. Jajca ubijcie ze cukrym i solōm, a niyskorzi¹³ dociepcie¹⁴ tam mōnka i ôchōdzōno masa ze szokoladōm. Wymiyszejcie, wlyjcie do ôkrōngłyj formy i na 30 min do bratruły¹⁵ ôzgrzōnyj¹⁶ na 165 stopni.

Na wiyrch mogecie sie dać jakego dżymu, kōnfitury, ubityj śmiytōnki abo i nic 😉 Smacznego 🙂