Szpajza francuskoł (Mousse au chocolat)

Ludzie sie bez wakacje smykajōm¹ po cołkim świecie, próbujōm roztomajtego jedzynia, a potyn jadōm do dōm i sie myślōm, że zjedli by sie tego łōnego abo i tyj łōnyj 😉 I bez to żech sie pomyśloł, co by sam tera trocha powspōminać roztomajte rajzy² i te wakacyjne smaki. Na poczōntek cojsik do pomaszkycynia³ ze Francji: Mousse au chocolat, na ftory u nos niyjedna ōłma⁴ by padała, co to je tako trocha inkszoł szpajza 😉

Co potrza?

200g szokolady (moge być jedna gorzkoł, a jedna mlycznoł)

25 g masła

3 jajca

50 g cukru

125 g krymōwki

2 łeżki wiśniōwki abo kōniaku

ździebko⁵ soli

Szokolada ze masłym sie rozpuście we jaki misce nad gorkym ze wrzōncōm wodōm, a jak już bydzie rozpuszczōnoł, to dejcie do tego 3 żōłtka i 2 łeżki sznapsa⁶.

Biōłka ubijcie ze cukrym na sztywnoł piana. Śmiytōnka we jaki osobnyj misce tyż ubijcie na sztywno- dejcie do tego ździebko soli.

Jak sie troszka ochōdzi⁷ ta szokolada ze dodatkami, to pomiyszejcie jōm delikatnie ze biōłkami i śmiytōnkōm. Dejcie do jakich fajnych szklōnek abo azjetek⁸ i wrojście do lodōwki aby na godzina, a nojlepi na 2, a potyn… smacznego 🙂