Torta choby ze Szwarcwaldu (Tort a’la szwarcwaldzki)

Jŏ¹ nojbarzi lubia take torty, kere² niy sōm ani za słodke, ani za tuste. Ta torta ze wiśniami je³ idealnŏ- intynsywny smak szokolady łōnczy sie ze słodyczōm i kwajśnymi wiśniami. Niy ma sam nic trudnego do narychtowania, bez to niy ma co sie łozpisywać i trza sie brać do roboty.

Co potrza?

Szokoladowy biszkopt:

6 srogich⁴ jajec

125 cukru

100 g mōnki

40 g kakao

mogecie tyż dać poła⁵ łeżeczki proszku do pieczynia, ale jak tyn biszkopt bydzie dobrze ubity, to proszek niy bydzie potrzebny

Kryjmy:

600-800 ml śmietōnki 36 %

2 abo 3 usztywniacze do śmietōnki

3 abo 4 łeżki cukru (jak dŏcie 800 ml śmietōnki, to lepi dać trocha wiyncyj cukru)

250 mascarpōne

1 szokolada deserowŏ

1 bojtel⁶ mrożōnych wiśni abo 500 g świyżych, wydrylowanych

2 keliszki nŏlywki ze wiśni

Biszkopt nojlepi narychtować dziyń pryndzyj⁷. Na poczōntek ubijcie jajca ze cukrym- nojprzōd pŏra minut na średnich obrotach, a potyn 8-10 minut na tych nojwiynkszych (nojlepi, jak mŏcie robota kuchynnego i niy bydziecie musieli stŏć i trzimać miksera). Włōnczcie bratruła⁸ na 175 stopni. Niyskorzyj⁹ wmiyszejcie do jajec przesiōnŏ mōnka i kakao- pomału, żeby nōm to niy siadło. Przełōżcie biszkopt do tortownicy i dejcie do bratruły na 30 minut.

Na drugi dziyń przekrejcie go na 3 placki i pokropcie je nŏlywkōm.

Ubijcie śmiytōnka. Pod kōniec dejcie tam cuker i usztywniacz. Łozpuśćcie szokolada we kōmpieli wodnyj (miska na gorku ze wrzōncōm wodōm).

Na spodek przidzie biszkopt, na niego dejcie poła śmiytōnki (mogecie tyż trocha odłożyć do szpricy do strojynia po wiyrchu). Jŏ żech sam używoł tyż folii cukierniczyj rantowyj¹⁰– fajnie bydōm sie nōm robić warstwy. Na śmiytōnka powciepujcie poła wiśni (pamiyntejcie, żeby pŏra łostawić na wiyrch).

Terŏzki przidzie drugi placek biszkoptu i na niego mascarpōne wymiksowane ze łozpuszczōnōm szokoladōm. Na ta masa zajś powciepujcie wiśnie.

Na sama gōra przidzie ôstatni kōnsek biszkotu i na niego zajś śmiytōnka.

Terŏzki mogecie jeszcze postroić wiyrch szokoladōm, śmiytōnkōm ze szpricy i wiśniōma. Na kōniec ôdwińcie folia, dejcie ta torta na chwila do chōdnego¹¹ i mogecie stawiać na kafyj¹².

Smacznego 🙂