Torta na Gody (Tort Bożonarodzeniowy)

Gody abo jak terozki¹ godajōm: Boże Narodzynie, to je taki czas, kej² sie lubiymy pomaszkycić. Apfylziny³ na świynta to bōło piyrwy⁴ cojś, mak tyż być musioł, bo przeca⁵ co to za świynta bez makōwek⁶. I tak żech sie pomyśloł, że na Gody narychtuja torta, kero połōnczy te dwa wspōmniynia i tak żech prziszoł na tyn leki, arōmatyczny i rozpływajōncy sie we gymbie deser. Takoł torta bydzie tyż dobro na karnawał… wtedy sie mogecie tyn biszkopt pokropić trocha sznapsym⁷ 😉

Co potrza?

5 jajec

5 łeżek cukru

5 łeżek mōnki

łeżeczka proszku do pieczynioł

5 łeżek mielōnego maku

połra łeżek śmietōnki 30 abo 36%

200 g biołyj szokolady

500 g mascarpōne

skōrka ze jednyj apfylziny

sok ze dwōch apfylzinōw

łeżka cukru do narychtowania karmelizowanyj skōrki ze apfylziny

Ubijcie biołka ze 5 łeżkami cukru na sztywnoł piana (mogecie tam tyż dlo przełōmania smaku wciepnōńć ździebko⁸ soli). Potyn wmiyszejcie pomału żōłtka, 5 łeżek przesiōnyj mōnki, łeżeczka proszku do pieczynioł i mak. Wylyjcie na forma i wrojście⁹ do rozgrzōnyj na 160 stopni bratruły¹⁰ na 40 minut. Po upieczyniu przewrōćcie ta forma do gōry dnym i ôstołwcie¹¹ na chwila- mogecie jōm nawet tak ze 20 cm ściepnōńć¹² na stōł.

Szokolada (dodejcie dō ni połra łeżek śmietōnki) ôzpuśćcie¹³ we jaki misce na gorku ze wrzōncōm wodōm. Jak sie fajnie ôzpuści, to jōm zmiksujcie ze mascarpōne.

Nożykym¹⁴ do ôbiyrania ściōngcie ze wyszorowanyj apfylziny pomarańczowo skōra (bez biołego), pokrejcie we kosteczka i wciepcie z łeżkōm cukru na patelnia. Jak sie cuker ózpuści i woda odparuje, to skōrka baje¹⁵ fertich¹⁶.

Wyciście sok ze apfylzinōw, wlyjcie do gorka i ôdparujcie z niego poła¹⁷ płynu- bydzie barzi arōmatyczny.

Przekrejcie¹⁸ biszkopt na pó¹⁹, oba placki ôblyjcie sokym ze apfylziny, 1/3 masy dejcie²⁰ miyndzy placki biszkoptu, a reszta ôzsmarujcie fajnie po wiyrchu. Na ôstatek posujcie²¹ na gōrze karmelizowano skōrka ze apfylziny. Terozki ôstała już yno rozpusta… smacznego 🙂