Torta prawie ajnfachowŏ (Tort prawie zwyczajny ;) )

Jakojsik niy miołech¹ za kans² czasu na bawiynie sie tortōm na fajer³ i tak naszło mie na takŏ idyja⁴ szokoladowŏ torta ze bezōm. Idzie pedzieć, że dojś gibko⁵ sie jōm rychtuje⁶. Yno ta beza potrzebuje trocha czasu na suszynie… ale przeca niy musicie ji wachować⁷ 😉

Biszkopt:

5 jajec

125 g cukru

100 g mōnki

40 g kakao

Do przełożynia:

krauzka⁸ kōnfitury abo dżymu ze wiśni, czornych jagōdek abo jakich inkszych⁹ leko kwajśnych owocōw

330-500 ml śmietōnki (30-36%)

śmiytanfix

2 łeżki pudecukru¹⁰

Beza:

2 biołka

pyrszczka¹¹ soli

1/3 szklōnki cukru

łeżka kartofylmyjlu¹²

łeżeczka soku ze citrōłny¹³

Jajca na biszkopt ubijcie ze cukrym. Nojprzōd chwila na mańszych¹⁴ obrotach, a potyn nawet ze 10 minut na nojwiynkszych. Przesiyjcie do tego mōnka, kakao i wymiyszejcie warzechōm, żeby Wōm to za kans niy opadło. Łozgrzyjcie bratruła¹⁵ na 175-180 stopni i wrojście tam biszkopt na 30 minut.

Jak uchōdnie¹⁶, a nojlepi na drugi dziyń- chyba,ze niy mŏcie aż tela czasu, przekrejcie go i posmarujcie dōł kōnfiturōm abo dżymym. Ubijcie śmiytōnka, pod kōniec dejcie tam śmiytanfix i pudecuker. Poła ślagzany dejcie na spodek ze dżymym, klapnijcie na to drugŏ połōwka i dejcie do lodōwki. Beza wciepcie na wiyrch dopiyro, jak już przidōm gojście i kafyj bydzie wōniōł fajnie we całyj chałpie¹⁷.

A jak narychtować beza? Ubijcie biołka ze cukrym, a jak już bydōm sztywne, to wmiyszejcie tam kartofylmyjl i sok. Na papiōrze do pieczyniŏ zaznaczcie ołōwkym kōłko wielkości tortownicy i posmarujcie je masłym. Na to wyłōżcie beza. Łozgrzyjcie bratruła na 160 stopni, a jak wrojzicie tam blacha ze bezōm, to zmniyjszcie tympyratura na 100. I niech sie to tak aby bez godzina posuszy. Na kōniec delikatnie ściōngcie jōm srogim nożym i wrojście jak korōna na torta. Smacznego 🙂

1miałem

2dużo

3imprezę

4pomysł

5szybko

6przygotowuje

7pilnować

8słoik

9innych

10cukru pudru

11szczypta

12mąki ziemniaczanej