Nolywka ze mlycza (Nalewka z mniszka lekarskiego)

Ta nolywka to je taki trocha eksperymynt- jak pisza tyn tekst, to niy wiym jeszcze do kōnca, jako bydzie smakować za połra miesiyncy, ale z tego, co żech już prōbowoł, to werci¹ sie jōm narychtować². Bo to, że taki mniszek je dobry na trołwiynie, kaszel, odpornojść, wōntroba i wiela inkszych, chyba już wiymy- niy ma co za dużo gołdać: to je aptyka we flaszce 😉

Pamiyntejcie yno, żeby niy pomylić mniszka ze mlyczym zwyczajnym. Zbiyrōmy yno te kwiołtki, kere rosnōm na pojedynczym sztynglu³, kery je driny⁴ pusty.

Co potrza?

na pó litrowy gorczek kwiołtkōw potrza pó litra szpyrytusu

pó litra wody

łeżka miodu (obo i trocha wiyncyj)

sok ze jednyj citrōłny

Nojprzōd⁵ zbiyrołcie⁶ kwiołtki- nojlepi do materiałowyj tasi⁷ abo koszyka, potyn trza je wysuć⁸ na godzinka, dwie abo trzi na bioło płachta⁹, żeby pouciekały ś nich chrobołki¹⁰. Gołdajōm¹¹, że tych kwiołtkōw moł sie niy myć- joł żech niy mōł, yno żech im zrobiōł porzōndny dyszcz 😉

Dejcie¹² je potyn do krauzy¹³, zalyjcie szpyrytusym i ôstawcie¹⁴ na tydziyń- choć joł żech to nawet trocha przeciōngnōł. Potyn przelyjcie to bez gaza abo jaki kōnsek materiału i richtich¹⁵ dobrze wyciście kwiołtki. Szpyrytus przidzie nazod¹⁶ do krauzy, a do kwiołtkōw wlyjcie pó litra wody i powołrzcie¹⁷ je bez chwila. Jak sie tyn wywar ochōdzi, to przelyjcie go zajś bez gaza, wyciście te kwiołtki (im już mogecie podziynkować), dejcie sok ze citrōłny i wmiyszejcie miōd- dejcie nojprzōd łeżka, a keby Wōm to bōło po wymiyszaniy ze szpyrytusem za mało słodke, to mogecie dać i drugo, trzecio… nojlepi keby bōło wiyncyj szpyrytusu, jak miodu 😉